Францускиот бренд го искористи eWays ElectroPop настанот за да ја објасни својата стратегија за електрификација.
Renault има големи амбиции кога станува збор за електрификацијата – планираат дури 10 нови возила на батерии до 2025. Меѓу нив ќе видиме нов Renault 5, нов Renault 4ever кој ќе биде реинкарнација на Renault 4 во форма на електричен SUV, како и нови комерцијални електрични возила. Најавена е и CMF-BEV платформа наменета токму за електричните возила.
Сепак, интересни се и новостите околу цените. Благодарение на многуте компоненти кои ќе се користат кај многу различни модели и ниската цена на платформата со моќност од 100 kW, новиот Renault 5 ќе биде 33% поевтин од електричниот Zoe – а со тоа Renault најавува дека сака да ги направи електричните возила што е можно подостапни за обичните купувачи.
Сериската верзија на новиот MeganE електричен кросовер ќе пристигне следната година, а за понатаму е потврден и поголем електричен SUV. Овие две возила ќе бидат поставени на CMF-EV платформата наменета за возила од Ц и Д сегментот, и се очекува дека овие возила ќе имаат автономија од околу 580 километри според WLTP. Интересно е дека од Renault потврдија дека оваа платформа ќе ја користат и други брендови од алијансата, и дека до 2025 ќе бидат произведени околу 700.000 возила. Според најавеното, до 2025 над 65% од возилата на Renault ќе бидат или целосно-електрични или хибридни, а веќе до 2030 дури 90% од возилата ќе бидат на батерии.
Не е заборавено ниту на спортските модели – во 2024 Alpine ќе добие три електрични модели – купе, хот хеч и некаков GT. А сето ова ќе биде поддржано од новиот Renault ElectriCity екосистем на производни капацитети поставен во Франција. Трите фабрики во Douai, Maubeuge и Ruitz ќе произведуваат електрични 400.000 возила годишно до 2025. Секако, ќе се користат и други фабрики – како на пример мегафабриката на Renault во Нормандија, каде ќе се произведуваат погоните. Во соработка со трети партнери и производствени погони, Renault планира да произведе 1 милион батерии за сите брендови во алијансата до 2030. Амбициите на Renault се да ги намали трошоците за батерии за 60% за помалку од 10 години.
Сето ова значи дека францускиот бренд не само што забрзано ќе се трансформира, туку дека ќе придонесе и за забрзана електрификација на другите брендови во алијансата – а со најавените Renault 5 и 4ever можеме да очекуваме и навистина кул и авангардни дизајни кои ќе евоцираат спомени на минатото, но и ќе ја покажат насоката на идните модели на Renault. Со нетрпение ги очекуваме!
