Renault најави дека планира да лансира дури седум нови електрични возила до 2025 – а еден од нив ќе биде целосно новиот, електричен Renault 5!
Автомобилот кој го гледаме на фотографиите не е концепт, туку е прототип – а тоа кажува дека серискиот производ не би требало да изгледа премногу различно. Разлики ќе има – секако, но погледнете го! Под капата на Luca De Meo, Renault веќе го претстави својот прв ретро-футуристичен модел и мора да кажеме дека изгледа спектакуларно!
Новиот прототип евоцира спомени на легендарниот Renault 5 GT Turbo, но сега за сега немаме никакви информации ниту околу електричниот погон, ниту пак околу перформансите. Според Renault – односно Luca De Meo, новиот Renault 5 ќе биде „електричен автомобил кој многу, многу луѓе ќе можат да си го дозволат.“
Дополнително, новиот директор за дизајн на Renault – Gilles Vidal – додадек дека „Дизајнот на Renault 5 Prototype е базиран на легендарниот R5, наш култен модел. Овој прототип едноставно ја отелотворува модерноста и е возило кое е релевантно за своето време – урбан, електричен и привлечен.“
Renault додаваат дека овој прототип е новиот Nouvelle Vague за брендот и дека најавува возбудлива, електрична иднина. По она кое го гледаме – ни се допаѓа!
