Новиот Grand Cherokee L не е замена за Grand Cherokee, туку е поголема, полуксузна верзија која ќе се продава покрај „помалиот“ брат.
Grand Cherokee L покрај со димензиите, се издвојува и со дизајнот – всушност, тој не наликува воопшто на тековниот Grand Cherokee туку најверојатно ја најавува идната дизајнерска насока на Cherokee и Grand Cherokee. На предниот дел доминираат големата маска и LED предните светла, како и веќе-препознатливите седум вертикални „решетки“ на маската. Формата е конвенционална за еден SUV – но тоа гарантира многу простор во ентериерот. На задниот дел вниманието го привлекуваат широките и тенки LED светлосни елементи.
Кабината е вистински чекор нагоре за Jeep. На централната конзола може да се добие 8.4 или 10.1 инчен мултимедијален уред со најновиот UConnect 5 инфозабавен систем. Пред возачот стандардно ќе се вградува 10.3-инчен дигитален панел со инстурменти.
Продолженото меѓуоскино растојание значи дека Grand Cherokee L добива и трет ред седишта, како и многу, многу простор во багажникот. Jeep ќе нуди четири различни изведби – Laredo, Limited, Overland и Summit. Токму Summit е најлуксузната верзија и добива и загревање и ладење и на задните седишта, масажа на предните седишта, премиум аудио уред со 19 звучници и многу, многу повеќе.
Во однос на погонските единици, големиот Grand Cherokee L ќе може да се добие со 3.6-литарски V6 со 290 коњски сили, или пак со 5.7-литарски HEMI V8 со 360 коњски сили. Секако, стандардно ќе доаѓа со автоматски менувач. Сега за сега нема информации за погонски единици кои би се нуделе во Европа.
Интересно, Grand Cherokee L ќе може да се добие со погон само на задните, или пак со погон на сите четири тркала. Ќе може да се добие и Quadra-Lift систем за адаптивна воздуна суспензија со неколку различни режими кои овозможуваат значително зголемување на растојанието од подлогата.
