Според податоците кои тукушто пристигнаа од Hyundai, новиот плаг-ин хибриден Tucson ќе има вкупно 265 коњски сили и со полни батерии ќе може да помине околу 50 километри.
Веќе знаеме скоро сè за новиот Tucson, но Hyundai денес ги објави податоците околу плаг-ин хибридната изведба на најновата генерација на популарниот SUV. Tucson Plug-In Hybrid ќе комбинира 1.6-литарски Smartstream T-GDI турбо-бензинец кој испорачува 177 коњски сили, со електромотор кој испорачува дополнителни 90 коњски сили. Електричната енергија ќе доаѓа од литиум-полимерски батериски модул со капацитет од 13.8 kWh.
Резултат на сето ова е системска моќност од 265 коњски сили и 350 Nm вртежен момент, а од Hyundai додаваат дека плаг-ин хибридниот Tucson ќе може да помине околу 50 километри според WLTP стандардизираниот тест-циклус.
Hyundai Tucson Plug-In Hybrid ќе доаѓа со HTRAC погон на сите четири тркала и автоматски менувач, како и многу, многу опрема. Интересен новитет е системот за активна аеродинамика кој ќе ги отвора или затвора отворите за воздух на предниот дел од автомобилот во зависност од неколку параметри – а со тоа значително ќе ја подобри аеродинамиката.
Нарачките се очекува да започнат веќе на почетокот на следната година.
