Новиот Defender станува уште поинтересен со новиот P400e плаг-ин хибрид и моќниот D300 турбодизел!
За да го направи Defender уште попривлечен за купувачите, Land Rover ја зголемува палетата на достапни погонски единици кај новиот теренски суперхерој. Погонот кај новиот, плаг-ин хибриден Defender P400e комбинира 2-литарски турбо-бензинец (кој испорачува 300 коњски сили) со електромотор (со моќност од 100 kW), за вкупна, системска моќност од 404 коњски сили и 640 Nm вртежен момент.
Според официјалните податоци, со овој погон Defender ќе може да забрза до 100 километри на час за 5.6 секунди, со полни батерии ќе може да помине до 43 километри само на електрична енергија, a официјалната потрошувачка е само 3.3 литри бензин на 100 километри.
Дополнително, Land Rover ја проширува понудата на турбодизелски погони со новиот D300. Новиот, линиски шест-цилиндерски D300 испорачува (погодувате) 300 коњски сили и 650 Nm вртежен момент – доволно за големиот теренец да може да забрза до 100 километри на час за 6.7 секунди.
Интересно, за новата моделска година Land Rover ги елиминира четири-цилиндерските D200 и D240, и ги заменува со нови D200 и D250 – кои се всушност варијанти на новиот линиски шест-цилиндерски турбодизел. Дизелите имаат Mild Hybrid технологии за зголемена респонзивност, намалена потрошувачка и подобри перформанси.
Ние веќе го возевме новиот Land Rover Defender – нашиот тест можете да го прочитате тука.
