full screen background image
Search

ТЕСТ: Jeep Compass 2.0 M-JET 4×4 Limited – Конечно, вистински Џип!

Американскиот бренд Jeep денес е најпознат по големиот Grand Cherokee – но што се добива кога ќе земете инспирација токму од големиот SUV и ќе ја пренесете неговата неизбежна доминантност во помало пакување?

Jeep е легендарен бренд – едноставно, не постои други начин да се истакне влијанието кое Jeep го има врз светот. Своевремено, претседателот на САД – Двајт Ајзенхауер – кажа дека Jeep Willys MB беше „едно од трите одлучувачки оружја кои САД ги имале во втората светска војна.“

Големи чевли за пополнување. Но ајде да бидеме искрени – брендот Jeep сосем добро ја продолжи традицијата и го искористи своето наследство на најдобриот можен начин. Ширум светот (не, не само кај нас) теренците се нарекуваат „Џипови.“ Тоа е наследство и влијание за кое брендовите можат само да сонуваат.

Првиот посериозен обид на Jeep да направи помал SUV кој ќе биде интересен и за европските купувачи беше некаде на средината на 2000-тите години со првата генерација Compass. Тој обид не беше нешто особено успешен – едноставно, тогашниот Compass не успеа да го задржи вниманието и да биде популарен меѓу купувачите. Американците како да ја научија лекцијата – и со новата – втора генерација на Compass – играат со силни крати.

Дизајнот на Compass влече инспирација од гооолееемиот Grand Cherokee

Како тоа? Па – за почеток – дизајнот на новиот Compass влече инспирација директно од гооолеееемиот Grand Cherokee. Секако, не може да се каже дека Compass е едноставно Grand Cherokee намален за дваесеттина проценти – но дури и да го кажете тоа нема да бидете преееемногу далеку од вистината. На предниот дел добиваме слични тенки предни светла и слична маска на ладилникот со вертикални отвори, профилот е едноставени безвременски, а на задниот дел добиваме интересни светлосни групи со изразено-тродименизонална графика.

Поврзано:   Jeep Gladiator пристигнува во Европа со V6 турбодизел со 260 коњски сили

Нашиот автомобил дојде во супер-привлечна сина боја и црн кров и со големи 19-инчни тркала – комбинација која одлично му прилега на „Американецот“ и притоа успешно ги истакнува димензиите и пропорциите на Compass.

Комфорна и просторна кабина со многу „играчки“.

Одиме внатре. Како што и очекуваме, кабината е просторна и комфорна. Американците научиле некоја лекција и кога станува збор за изборот на материјали и дизајн во ентериерот. Двобојната комбинација во кабината успешно ја раздвижува атмосферата и во кабината има повеќе од доволно простор.

Предните седишта се комфорни но ќе забележиме дека им недостасува малку странична поддршка – инаку, седечката позиција е одлична! Прегледноста е повеќе од задоволителна и прилично лесно ќе се снајдете со сите команди. На средината на управувачот гордо стои знакот на Jeep, а сите инструменти и индикатори се лесни за разбирање.

При прв контакт, 8.4-инчниот UConnect мултимедијален уред со навигација и многу други ситници е малку конфузен – но брзо ќе се навикнете на него. Генерално, скоро сите површини во кабината се покриени со фини материјали, и да – иако има некои поцврсти пластики на некои места, сепак во кабината се чувствувавме пријатно и комфорно.

На задната клупа комфорно ќе се сместат двајца (па и тројца) патници – централниот тунел низ кој минува „хардверот“ потребен за придвижување на задните тркала не е премногу висок, а тоа го олеснува користењето на средното седиште. Багажниот простор е достапен преку широк и правилен отвор, а на располагање ќе имате капацитет од 438 литри.

Моќен турбодизел со 140 коњски сили

Нашиот Compass под поклопецот го носеше најновиот 2-литарски MultiJet турбодизел кој доаѓа од гамата на FCA. Модерниот турбодизел испорачува 140 коњски сили при 4000 вртежи во минута и 340 Nm вртежен момент од 1750 вртежи во минута.

Поврзано:   Jeep Gladiator пристигнува во Европа со V6 турбодизел со 260 коњски сили

Силата ја пренесува преку 6-брзински мануелен менувач кон сите четири тркала – иако во реалноста, во секојдневни услови на возење, како и сите модерни SUV модели поголемиот дел од силата ја испорачува само кон предните тркала со цел да се намали потрошувачката – која во градски услови е некаде меѓу 7.5 и 8.5 литри на 100 изминати километри. Бенчмаркот од 100 километри на час се постигнува за 10.1 секунда, додека максималната брзина е 190 километри на час.

Комфорен на пат, супер-компетентен „кога ќе снема асфалт“

Каков е Compass на обичен асфалт? Повеќе од задоволителен. Лесно ги пегла нерамнините од нашите улици, и иако не би рекле дека се работи за особено спортски теренец (а и не ни треба да биде), Compass совладува свиоци без премогу навалување во нив. Менувачот е супер-лесен за користење, сопирачките се лесни за дозирање и маневрирањето во град е сосем лесно – иако се работи за не баш мал автомобил. Секако, паркирањето го олеснуваат паркинг-сензорите.

Но Compass е во вистинско светло кога ќе го напуштите асфалтот и ќе го насочите кон нешто попредизвикувачко. Системот за погон на сите четири тркала ви нуди неколку различни режими – Auto (кој е само-објаснувачки), Snow (за движење во снег), Sand (за песок) и Mud (за кал).

Во која ситуација и да се наоѓате, едноставно одберете го режимот кој одговара на ситуацијата и за Compass скоро и да не постојат ограничувања. Секако, доколку е потребно можете да го заклучите диференцијалот за тој да испорачува иста сила кон сите четири тркала – и Compass ќе може „да се извади“ дури и од навистина интересни ситуации. Секако, вреди да се напомене дека Jeep Compass има агол на пристапување од 30 степени и агол на заминување од 33.6 степени.

Поврзано:   Jeep Gladiator пристигнува во Европа со V6 турбодизел со 260 коњски сили

Богата опрема – многу, многу играчки

Набрзина, пред да заокружиме – да зборуваме малку за опремата. Нашиот тестен модел дојде во Limited ниво на опрема – а меѓу другото тоа значи дека добивме седишта делумно обвиени во кожа (со загревање на предните седишта), темпомат, UConnect мултимедијален уред со навигација и Bluetooth, паркинг сензори, електрична рачна кочница, LED задни светла, LED дневни светла, двобојна каросерија, кровни носачи, 7-инчен дисплеј кај инструментите, автоматски двозонски клима уред, самозатемнувачки внатрешен ретровизори, супер-моќен Beats аудио систем за да им додевате на соседите во „ниедно време“, 19-инчни тркала и уште многу, многу ситници и детали.

Заклучок – Compass е џип во вистинската смисла на зборот!

Нашето прво официјално дружење со некој од моделите на Jeep ни остави навистина позитивен впечаток. Теренските можности во комбинација со привлечниот дизајн, богатата опрема и економичниот турбодизел лесно ќе најдат свои фанови. И навистина – многу е добро кога можете да кажете – Возам Џип. Каков џип? Па Jeep – џип!

Спецификации

Модел: Jeep Compass 2.0 Mjet 140 4×4 Limited
Мотор: 2-литарски турбодизел, 4 цилиндри
Моќност: 150 коњски сили / 3750 вртежи во минута
Вртежен Момент: 340 Nm / 1750 вртежи во минута
Менувач: Мануелен, 6 брзини
Забрзување 0-100 км/ч: 10.1 секунда
Максимална Брзина: 190 километри на час
Должина: 4394 mm
Ширина: 2033 mm (со странични ретровизори)
Висина: 1644 mm
Тежина: 1615 килограми
Меѓуоскино Растојание: 2636 mm
Багажен Простор: 438 литри
Потрошувачка: 8.2 литри на 100 километри (измерена, градска)
Цена на основниот модел: Jeep Compass 1.4 140 MTX FWD – 25.000 Евра
Цена на тестираниот модел: Jeep Compass 2.0 Mjet MTX 4×4 Limited – 34.100 Евра
Повеќе Информации: Jeep.mk

Фотографии

Фотографија: Дејан Маликовски



Алфа и Омега на CARclub. Играчките остануваат, само стануваат поскапи.