Новиот Gladiator тукушто беше лансиран во Америка (и првата серија се распродаде за помалку од 24 часа), а Jeep подготви шест супер-кул концепти за Moab Easter Safari – меѓу кои и еден рестомод со 707 коњски сили!
Сите концепти – освен големиот M-715 Five-Quarter рестомод – го користат 3.6-литарскиот мотор кој стандардно се нуди кај Gladiator. М-715 користи 6.2-литарски компресорски HEMI V8 (да, да, истиот мотор од Challenger Hellcat) за да располага со 707 коњски сили.
Инаку, сите концепти добиваат по нешто уникатно и специфично. Секако, тука се неизбежните теренски способности кои „по дифолт“ ги асоцираме со Jeep но J6 е специјално модификуван да има само предни седишта и поголема товарна кабина.
Од друга страна, Wayout е предвиден да биде идеално возило за сафари. JT Scrambler е ретро-инспириран од легендарниот CJ Scrambler, а Flatbill е предвиден да пренесува крос-моторцикли низ пустината. Интересен е и Jeep Gladiator Gravity, кој е направен само од делови кои веќе можат да се нарачаат – а со тоа се демонстрира можноста за персонализирање на вашиот Gladiator.
Jeep M-715 Five Quarter едноставно изгледа фраерски, сè друго околу него не е веќе ни толку важно. Страшно фраерски.
