25 години беа потребни на британскиот бренд McLaren да создаде достојна замена за легендарниот McLaren F1. Претставен како McLaren Speedtail, супер-брзиот хипер-автомобил наменет за поминување големи километражи по уште поголеми брзини ветува максимална брзина од дури 402 км/ч за своите тројца патници – да, добро прочитавте, Speedtail ја продолжува McLaren-овата легенда на хипер-брзи автомобили за тројца луѓе.
25 години се доста долг период за размислување, па така, тимот на McLaren – со цел да оддаде почит на автомобилот кој долго време ја бранеше титулата „најбрз патнички автомобил“ – на прототипот MVY02 му го додели прекарот „Albert“ – и тоа по Albert Drive, улицата во Вокинг, Велика Британија, каде се наоѓа студиото во кое е дизајниран McLaren F1. Овој прототип на Speedtail ќе биде еден од неколкуте кои веќе се тестираат по патиштата низ целиот свет.
Она што го издвојува Алберт од другите прототипови е дека ја добива првата шасија изработена по производствени спецификации, како и прототип (но многу близок до финалната верзија) на хибридната погонска единица која ќе испорачува 1036 коњски сили. Според Ben Gulliver, одговорен за развој на McLaren-ови возила „Тука почнува вистинскиот тест за Speedtail. Конечно ќе можеме детално да работиме на рафинирање на дизајн, системите за кочење и управување и амортизацијата со цел што побрзо да понудиме автомобил без компромиси на своите купувачи“.
Освен трите седишта, помеѓу Speedtail и F1 идентична е и бројката на автомобили кои ќе се произведат – 106. Speedtail ќе забрзува од 0 до 300 км/ч за навистина неверојатни 12.8 секунди, и почетната цена ќе изнесува 1.75 милиони евра (плус даноци), но ве уверуваме – нити еден Speedtail нема да биде платен по својата почетна цена. Сите 106 автомобили беа продадени пред моделот да биде претставен, и ќе одат во рацете на најбогатите светски колекционери и љубители на автомобили кои несомнено екстензивно ќе ги персонализираат автомобилите.
