full screen background image
Search

Премиера: Toyota го претстави новиот робустен, модерен RAV4!

Моделот со кој започна кросовер револуцијата пред скоро 25 години влезе во својата најнова, петта генерација – а со неа доаѓа и нов, робустен и впечатлив дизајн, како и грст нови технологии!

Пораката на Toyota е повеќе од очигледна – сакаат да се „вратат“ кон  корените, односно кон првиот модел, кој токму заради привлечниот дизајн го постигна она што го постигна. И веднаш е јасно – Rav4 нема да го помешате со моделот од тековната генерација, ниту пак со некој друг модел. Новиот автомобил изгледа како да е „исклесан“ – и токму затоа ќе се издвојува од директните конкуренти.

Силните линии и впечатливите детали се само мал дел од новитетите – ќе добиеме и LED предни светла, гооолема маска на ладилникот и аглест заден дел кој успешно ја крие SUV формата и нуди скоро купеовски лик кој дефинитивно асоцира на моделот NX од луксузниот бренд на Toyota – Lexus.

Слична приказна за робустност продолжува и во кабината – ентериерот е целосно нов и дефинитивно помодерен од досегашниот. На централната конзола доминира големиот мултимедијален уред, а веднаш под него се поставени засебни контроли за клима уредот. Ни се допаѓа и големата рачка од менувачот – кабината (како што и очекувавме) делува практична, корисна и комфорна. Со оглед на тоа дека новиот RAV4 е понизок, поширок и нијанса пократок од својот претходник, очекуваме и дарежлива просторна понуда.

Сега за сега Toyota објави детали за две погонски единици – едниот мотор е 2.5-литарски атмосферски бензинец, а втората варијанта е веќе добро-познатата хибридна комбинација која комбинира 2.5-литарски бензинец со електромотор и CVT менувач. Не се објавени податоци околу перформансите, но очекуваме освежениот хибриден погон да понуди интересни бројки.

Поврзано:   Протекоа првите фотографии од Toyota GR Corolla!

Новата Toyota RAV4 се очекува да пристигне на европскиот пазар на почетокот на следната година. Во меѓувреме, прочитајте го нашиот тест на тековниот модел – и тоа во хибридна изведба.



Алфа и Омега на CARclub. Играчките остануваат, само стануваат поскапи.