Спортското луксузно купе на јапонскиот премиум производител Lexus денес беше претставено пред македонските медиуми.
Според она што го кажуваат луѓето од Lexus, луксузното купе кое ја носи ознаката LC е олицетворение на новата архитектура на брендот која ветува исклучителни перформанси и динамика. Ние мораме да додадеме дека LC500h изгледа вонземско, како да потекнува од друга планета и дефинитивно се издвојува од скоро сè друго на нашите улици.
Серискиот автомобил е базиран на LF-LC концептот од пред неколку години, и има задржано многу од екстравагантните детали. Во понудата се две изведби – верзијата LC500 која користи 5-литарски атмосферски V8 кој испорачува 477 коњски сили и 540 Nm вртежен момент, како и хибридниот LC500h кој комбинира 3.5-литарски атмосферски V6 со електромотор за вкупно 360 коњски сили – и забрзување до 100 километри на час кое трае помалку од 5 секунди. Интересен новитет кај LC500h е и Multi-Stage Hybrid трансмисијата која нуди интересна комбинација од CVT менувач и конвенционален автоматски менувач.
Истовремено, нашите пријатели од Toyota Автоцентар се пофалија дека е пристигнат и фејслифтираниот Lexus NX300h. Со освежувањето, популарниот хибриден SUV добива затегнати линии, редизајнирани светлосни групи со LED технологија, новитети во ентериерот во однос на достапни технологии, како и доработки во однос на рафинираноста и звучната изолација.
Новиот LC500h во моментов е изложен во салонот на Toyota Автоцентар и ќе биде достапен за разгледување и тест-возење до оваа Сабота – а ние веќе имавме можност да го возиме големото луксузно купе и утре ќе ви ги пренесеме нашите впечатоци.