Побарувачката за новиот RS5 во Европа е речиси двојно поголема од првичните очекувања на компанијата, поради што целокупната производствена квота предвидена за 2026 година е веќе целосно распродадена.
Новата генерација на RS5 се нуди во две каросериски изведби, односно како лимузина со пет врати и како караванска Avant верзија.
Иако продажбата руши рекорди, главна тема на дебата меѓу ентузијастите е масата на автомобилот. Поради батерискиот систем и хибридната технологија, новиот RS5 Avant тежи дури 2.370 кг, што е за речиси 600 кг повеќе од претходната генерација и го прави потежок дури и од одредени големи SUV модели.
Од Audi Sport јавно ја бранеа оваа одлука, тврдејќи дека благодарение на новиот систем за векторско управување на вртежниот момент на задната оска, автомобилот во возење делува значително поагилно отколку што сугерираат бројките на вагата.
По силните продажни резултати и високиот интерес на европскиот пазар, Audi се подготвува за проширување на продажбата на други глобални пазари, вклучувајќи ги Австралија, Нов Зеланд, Азија и Северна Америка.
