Со најавата за електричниот концепт кој ќе го промовира на саемот на автомобили во Шангај, Škoda ја објави својата стратегија за електрична мобилност.
Новиот Vision E е првата електрична „студија“ на брендот, и со него Škoda ги најавува своите можности во овој сегмент. Според гласините, концептот ќе биде најава за електрична верзија на Kodiaq, а димензиите (должина од 4645 милиметри, ширина од 1917 милиметри и висина од 1550 милиметри) скоро и да ги потврдуваат овие гласини. Всушност, во самата најава за Vision E, Škoda кажува дека концептот кој е ориентиран кон иднината комбинира висока седечка позиција типична за SUV со динамична силуета и опаѓачка кровна линија во стилот на купе.
Вкупната системска моќност е 225 kW, која му овозможува на концептот автономија од 500 километри и максимална брзина од 180 километри на час. Сето ова се должи на моќни литиум-јонски батерии и систем за рекуперација. Концептот има два електромотори кои со максимална ефикасност ги придвижуваат сите четири тркала. Дополнително, концептот ги исполнува барањата за автономност од трето ниво – може да функционира независно во метеж, да користи автопилот на отворен пат, да ја задржи својата сообраќајна лента на движење но да избегнува пречки и да претекнува, да бара слободно паркинг место и да се паркира, итн. За сето ова да биде возможно, концептот користи грст сензори и камери кои цело време го следат сообраќајот и ги овозможуваат овие функционалности.
Со Vision E, Škoda ја објави својата стратегија за електрификација. Според најавеното, во 2019 ќе пристигне plug-in хибридна верзија на популарниот Superb, а првиот целосно-електричен модел ќе биде лансиран една година подоцна, во 2020. Чешкиот производител најави дека до 2025-тата година ќе нудат вкупно пет електрични модели во различни сегменти.