Првиот вистински SUV на SEAT ветува многу – а ние поминавме неколку дена со Ateca опремена со 2-литарски TDI, во највисокото, XCELLENCE ниво на опрема!
Дали се сеќавате на Seat Altea Freetrack? Да? Заборавете ја – новата Ateca е првиот вистински SUV на SEAT. Во ред, сега кога го решивме тоа прашање, можеме да се посветиме на важните детали.
Рецептот е лесен. Земете ја MQB платформата која веќе широко се користи низ брендовите на Volkswagen групацијата, изберете модерни мотори, капнете неколку капки погон на сите четири тркала и напрскајте либерална количина шпански карактер – и ја добивате Ateca!
Ateca ја зема моменталната дизајнерска насока на SEAT и ја интерпретира во нова форма за брендот. Замислете го одличниот Leon, но трансформирајте го во современ SUV и она што ќе го добиете е привлечен и модерен автомобил. Дизајнерите на SEAT решиле да ги заобиколат флуидните линии кои се некако преприсутни кај конкурентите, и да понудат дизајн кој е остар, дециден и самоуверен.
На предната страна доминираат големите LED светлосни групи со вградени дневни светла и широките отвори за воздух. Страничните линии се покласични (и од овој агол Ateca највеќе наликува на својот брат од Volkswagen – новиот Tiguan), а на задниот дел вниманието го задржуваат светлосните групи и интересните „прекршени“ линии на поклопецот од багажниот простор. Сè на сè, Ateca изгледа модерно, привлечно и динамично.
На екстериерот ни се допаднаа и ситните детали како двојните завршетоци на издувниот систем, 18-инчните фелни и заштитните пластики околу целиот автомобил, кои на Ateca и даваат поробустен изглед. Ние би избрале похрабра боја од онаа на нашиот тестен автомобил, но инаку – други замерки на дизајнот немаме.
Ако сте седеле во новиот Leon, тогаш Ateca ќе ви биде веднаш препознатлива. Дизајнот и распоредот на инструментите е идентичен како кај хечбекот, но во Ateca кабината е дополнително „разиграна“ со неколку детали во боја. Скоро сите површини се обложени со меки и убаво-текстурирани материјали, а главниот примат го зема токму големиот мултимедијален уред со вградена навигација и SEAT FullLink – односно Android Auto, Apple Carplay и MirrorLink поврзување.
Ергономијата е типично германска – сите команди се токму онаму каде очекувате да бидат, возачката позиција е одлична, а благодарение на големите стаклени површини, и прегледноста е задоволителна. Во ред, прегледноста кон задниот дел е малку попречена, но тоа е забелешка за сите вакви автомобили, а нашиот тестен автомобил имаше паркинг камера и паркинг сензори, па лесно се маневрира и во потесни улички.
Возачот и совозачот ќе седат удобно на привлечните седишта, а на задната клупа комфорно ќе се сместат двајца, па дури и тројца патници. Патниците на задната клупа ќе имаат повеќе од доволно простор како за главите, така и за колената бидејќи Ateca е поставена на малку подолга платформа од онаа на Leon. Ова резултира и со повеќе багажен простор – на располагање имате 485 литри кај верзиите со погон на сите четири тркала, односно 510 литри кај оние со погон само на предните тркала.
Гамата на погонски единици кај Ateca започнува со 1-литарскиот TSI кој нуди 115 коњски сили, а на самиот врв е 2-литарскиот TDI кој нуди 190 коњски сили. Нашиот тестен модел дојде опремен со 2-литарски TDI кој нуди 150 коњски сили и мануелен менувач, како и погон на сите четири тркала. Очекуваме токму овој мотор да биде најпопуларен на нашиот пазар – и има зошто. Моќниот турбодизел кој нуди 150 коњски сили и 340 Nm вртежен момент лесно го придвижува големиот SUV – според официјалните податоци, 100 километри на час се постигнуваат за рамно 9 секунди, а максималната брзина е 197 километри на час.
Според SEAT, вака опремана Ateca троши 5.1 литар дизел гориво на 100 изминати километри во комбинирани услови на возење. Ние измеривме просечни 7 литри на 100 километри – бројка која воопшто не е лоша за волку голем автомобил со погон на сите четири тркала.
Онаму каде се гледа вистинскиот шпански карактер на Ateca е на пат. Бидејќи SEAT е спортскиот бренд во Volkswagen групацијата, Ateca е токму она што очекувате – стабилна и динамична. Суспензијата е поцврста од онаа кај директните конкуренти, но не е непријатно и некомфорно цврста. Од друга страна – директен резултат на поцврстата суспензија е одличната управливост – едноставно, Ateca како да не е SUV. Ateca реагира подготвено на сите команди од управувачот, менувачот е директен и прецизен за користење, а каросеријата не се навалува премногу (односно, скоро воопшто) во свиоци. Во ред, ова можеби нема да биде по сечиј вкус – но оние кои сакаат малку подинамично возење ќе уживаат во карактерот на шпанскиот SUV.
Како и секогаш, мораме малку да зборуваме за опременоста и безбедноста. Како што веќе напоменавме, нашиот тестен автомобил беше во највисокото – XCELLENCE – ниво на опрема. Тоа значи дека нашиот тестен модел дојде со големите 18-инчни тркала, веќе-споменатиот мултимедијален уред, одлични LED предни светла, светло за добредојде во страничните ретровизори, автоматски клима уред, електрична паркинг-кочница, електрика на сите прозорци, паркинг камера и сензори за паркирање, Seat Drive систем за избор за режим на возење, спортски седишта делумно покриени со алкантара, и уште многу, многу други ситници.
Секако, Ateca не заостанува ни на полето на безбедноста – дел од стандардната опрема се 7 воздушни перничиња и цела гама на безбедносни системи. Ateca е веќе тестирана на EuroNCAP тестирањата, каде освои максимални 5 ѕвездички.
Ateca е интересен новитет во сегментот. Конкурентите во оваа категорија доаѓаат како од Европа, така и од далечниот Исток – и сите конкуренти се на пазарот веќе долго време, имаат етаблирани имиња и лојални купувачи. Но влезот на SEAT во овој сегмент е силен и самоуверен – Ateca е привлечен, практичен и економичен SUV кој истовремено може да ја игра улогата на семеен транспортер, но и динамичен сопатник за оние со похрабар дух.
Значи – конечно, можеме да се навратиме на рецептот за кој пишувавме на почетокот, и да го одговориме прашањето – рецептот е едноставен, но дали е успешен? Секако!
- Мотор: 2-литарски турбодизел, 4 цилиндри
- Моќност: 150 коњски сили / 3500 вртежи во минута
- Вртежен момент: 340 Nm / 1750 – 3000 вртежи во минута
- Максимална брзина: 197 км/час
- Забрзување 0-100: 9 секунди
- Должина: 4363 mm
- Ширина: 1841 mm без странични ретровизори
- Висина: 1601 mm
- Тежина: 1548 kg
- Меѓуоскино растојание: 2638 mm
- Багажен простор: 485 литри
- Потрошувачка на 100 км: 5.1 литар (официјална, комбинирана) 7.2 литри (измерена, градска)
- Цена на основниот модел: SEAT Ateca 1.0 TSI Reference – 18.990 Евра
- Цена на тестираниот модел: SEAT Ateca 2.0 TDI 150 4Drive XCELLENCE – 31.316 Евра
Повеќе информации: SEAT.com.mk
Фотографија: Дејан Маликовски