Шведскиот оддел на Seat претстави тркачки модел создаден во соработка со PWR Racing, кој има многу малку заедничко со серискиот Leon.
Што се однесува до најочигледното – дизајнот, моделот изгледа значително поразлично од три-вратната верзија од Leon и носи подолга и поширока купе каросерија со масивен заден спојлер, а тука се и поголемите предни, странични и задни отвори за вентилација.
Додека серискиот Leon е погонуван само од четири-цилиндарски агрегати, STCC моделот користи поголем 3.5-литарски V6 агрегат кој произведува 420 кс и ја испорачува силата преку шест степен секвенцијален менувач кон механичкиот диференцијал со ограничено пролизгување на задната оска. Leon STCC вози на 18-инчни тркала позади кои се наоѓаат дискови со дијаметар од 370 mm напред и 360 mm позади, со шепи со четири клипови.
Автомобилот ќе дебитира на првата трка од шампионатот која ќе се одржи на 30-ти Април на Skovde Аirport тркачката патека.