Францускиот бренд успеа да создаде импресивна форма со нивниот нов Exalt концепт, кој ќе дебитира на саемот за автомобили во Пекинг.
Exalt се протега во должина од 4.7 метри и е висок само 1.31 метар, а неговата маса не надминува 1,700 килограми. Моделот претставува четири-вратно купе со издолжен поклопец на моторот, набабрени странични крила и двобојна каросерија. Три четвртини од каросеријата е гол метал, додека задниот дел е обложен со „змиска кожа“ – текстил кој според Peugeot ја погобрува аеродинамиката на возилото и ја намалува потрошувачката на гориво.
Ентериерот се одликува со материјали од природна волна и дрво, како и дигитален инструмент панел, кој се состои од два преклопувачки екрани на допир. Тука се и седишта со изразени странични потпори, мал волан со зарамнети страни и украсни резби на дрвените елементи на средната конзола и панелите од вратите.
Концептот е замислен да биде погонуван од хибриден погон со вкупно 340 коњски сили. 1.6-литарскиот четири-цилиндарски турбо-бензински THP агрегат со 270кс (вграден во RCZ R) ќе ги погонува предните, додека електричниот мотор од 50 киловати ќе ги врти задните тркала.
Peugeot Exalt Concept ќе и биде прикажан на јавноста на 20-ти Април на автомобилскиот саем во Пекинг.
