Со 15 коњски сили повеќе од соодветните S модели, новите GTS изведби на Boxster и Cayman можат да се пофалат со малку подобри перформанси, но и со нов изглед благодарение на новите браници!
3.4-литарскиот 6-цилиндерски боксер мотор сега испорачува 330 коњски сили – 15 коњски сили повеќе од порано, но достапни се и незначително повисоки 10 Nm вртежен момент. Она што е интересно за Cayman и Boxster GTS е дека стандардно ќе се нудат со Sport Chrono пакетот, кој доколку го искомбинирате со PDK (Porsche Doppelkuplung Schaltgetriebe – кажете го ова набрзина 10 пати) ќе добиете автомобил кој забрзува до 100 километри на час за само 4.6 секунди кај Cayman GTS, односно 4.7 секунди кај Boxster GTS. Cayman GTS постигнува 285 километри на час, додека максималната брзина на Boxster GTS е нешто пониска, и изнесува 281 километар на час.
GTS всушност значи Gran Turismo Sport, а автомобилите со овој пакет ќе добијат и 20-инчни фелни, нови црно-обоени BiXenon предни светла, нови браници и надворешни детали во црна боја, а во внатрешноста ќе се нудат седишта изработени во комбинација од кожа и алкантара. Продажбата започнува во Мај оваа година, а цените во Германија ќе изнесуваат 69.949 Евра за Boxster GTS, односно 73.757 Евра за Cayman GTS.
