Само неколку дена пред официјалната премиера во Женева, Mitsubishi ги објави првите официјални фотографии од новиот кросовер кој во употреба враќа едно од најлегендарните имиња на брендот!
Eclipse Cross е првиот нов модел (и SUV) на брендот од преземањето на Nissan, и како што можеме да забележиме од фотографиите, Eclipse Cross е веднаш препознатлив како Mitsubishi. Веднаш се препознава дизајнерската линија на брендот преку маската на ладилникот и обликот на предните светла.
Задниот дел е малку невообичаен за Mitsubishi, и тука јапонскиот производител зема друга насока со дизајнот. Препознаваме некои детали кои влечат потекло од Outlander, но сè на сè, дизајнот е свеж, модерен и привлечен. Особено ни се допаѓа опаѓачката кровна линија која на новиот модел му дава доза на спортски карактер и динамичност.
Новиот Eclipse Cross ќе биде придвижуван од целосно нов 1.5-литарски турбо-бензинец со директно вбризгување, кој во соработка со CVT менувач (кој има 8-брзински Sport режим на работа) ја испорачува моќта кон електронски-контролиран погон на сите четири тркала. Во понудата ќе се најде и 2.2-литарски турбодизел со директно вбризгување кој е специјално доработен за потребите на Eclipse Cross и ќе ја пренесува моќта кон сите четири тркала преку нов 8-брзински автоматски менувач.
Eclipse Cross ја добива и најновата верзија на Super All-Wheel Control системот кој контролира неколку различни параметри за да понуди динамично возење во согласност со потребите на возачот. Од Mitsubishi истакнуваат и дека каросеријата на Eclipse Cross е зацврстена благодарение на дополнителни зајакнувања на предниот и задниот дел, кои уште повеќе го истакнуваат динамичниот карактер на новиот SUV и ја подобруваат стабилноста.
Според Mitsubishi, новиот Eclipse Cross е глобално-стратешки модел, и продажбата во Европа ќе започне во втората половина од оваа година, а понатаму ќе се продава и на други пазари ширум светот.