Доколку мислевте дека Audi RS Q8 Performance со своите 640 коњски сили е доволно моќен, германските тјунери од ABT имаат поинакво мислење. Запознајте го ABT RSQ8-LE 1000!
По повод одбележувањето на 130 години постоење, ABT Sportsline подготви навистина специјално издание на моќниот SUV на Audi. Резултатот е RSQ8-LE 1000 – екстремен SUV кој испорачува сила достојна за вистински хиперавтомобил!
Под поклопецот се крие добро познатиот 4-литарски твин-турбо V8, кој во фабричка конфигурација испорачува 640 коњски сили. Сепак, инженерите на ABT одлучиле дека тоа едноставно не е доволно, па благодарение на ABT Power R пакетот успеале да извлечат огромни 1000 коњски сили!
За да ги постигнат овие бројки, инженерите вградиле нови турбополначи, подобрен интеркулер и специјален систем за вбризгување вода и етанол, кој овозможува поефикасно ладење на моторот. Интересно, целосната моќност се активира преку myABT апликацијата, а за нејзино постигнување е потребен и бензин со октанска вредност од 102 RON.
Од ABT сè уште не откриваат колку време му е потребно на нивниот чартер џет да достигне 100 километри на час, но знаеме дека максималната брзина е зголемена на 320 километри на час!
Секако, дополнителните 360 коњски сили не се единствената новост. ABT подготви и целосен аеродинамичен пакет со карбонски додатоци, кој вклучува нов преден сплитер, проширени крила, странични прагови, отвори за воздух и голем заден спојлер.
Агресивниот изглед го заокружуваат огромните 23-инчни ABT IR23 тркала во златна боја, обвиени во пневматици со димензии 295/35 ZR23. Тука е и новиот спортски издувен систем со четири завршетоци со дијаметар од по 105 милиметри, додека надградениот ABT Body Control систем се грижи за контролата на каросеријата.
Измени има и во кабината, каде среќаваме управувач обложен со Алкантара, карбонски детали, специјални ознаки RSQ8-LE и уникатна плочка со серискиот број на автомобилот. Секој примерок добива и специјален јубилеен медал со кој ABT одбележува 130 години постоење.
И сега доаѓаме до најинтересниот дел – цената. ABT ќе произведе само 30 примероци, а пакетот за преработка чини 165.000 евра, плус дополнителни 20.000 евра за монтажа. Тоа се вкупно 185.000 евра, и тоа без цената на самиот автомобил! Доколку сакате комплетен RSQ8-LE 1000, ќе треба да одвоите околу 345.000 евра.
