Jeep го искористи овогодинешниот SEMA саем во Лас Вегас за да го претстави Wrangler Scrambler SRT Concept – брутален теренски концепт кој комбинира ретро дизајн, V8 моќ и напредна технологија за совладување на најтешките терени!
Инспириран од оригиналниот CJ-8 Scrambler од 80-тите години, новиот концепт е базиран на Wrangler, но добива каросерија со две врати, отворен товарен простор и агресивен дизајн кој јасно ги открива неговите теренски амбиции.
Веднаш се издвојува по впечатливата Punk’n портокалова боја, широките крила, огромните теренски пневматици и бронзените тркала со beadlock систем. Предниот дел добива ретро-инспирирана Sharknose маска, додека подолгите врати, масивниот заштитен кафез и отстранливиот покрив дополнително го нагласуваат авантуристичкиот карактер.
Но најинтересното се крие под каросеријата. Новиот Scrambler SRT Concept добива HEMI V8 кој испорачува 470 коњски сили и околу 637 Nm вртежен момент. И да, ова е Jeep кој е подготвен не само да ги совладува најтешките терени, туку и да го прави тоа со навистина високи брзини!
За таа цел, инженерите подготвиле нешто навистина интересно – за прв пат кај Wrangler, концептот добива независна предна суспензија. Развиена во соработка со оф-роуд шампионот Кејси Кари, новата суспензија овозможува подобра стабилност, попрецизно управување и поголема контрола при брзо возење по нерамни терени. Задната оска е инспирирана од специјализираните Trophy Truck тркачки возила.
И тука не завршуваат интересните решенија. Товарниот простор крие уште едно изненадување – дополнителни седишта кои можат да се завртат за 180 степени, па патниците можат да седат свртени наназад. Секако, седиштата можат и целосно да се отстранат, со што Scrambler се трансформира во практичен пикап со голем товарен простор.
Кабината добива спортски седишта, Dark Graphite кожа со портокалови детали, контрастни шевови, бронзени акценти и SRT ознаки. Целата комбинација изгледа истовремено робустно, спортски и – мораме да признаеме – навистина привлечно!
Засега, Wrangler Scrambler SRT останува концепт, но Jeep веќе потврди дека името Scrambler ќе се врати во понудата. Серискиот модел би требало да биде покомпактна и поспортска алтернатива на Gladiator, иако сè уште нема официјален датум за неговото пристигнување.
Ако серискиот Scrambler изгледа барем приближно вака, ние немаме ништо против. Всушност, со V8 под поклопецот и ваков теренски потенцијал – што повеќе би можеле да посакаме?
