Mercedes-Benz официјално го претстави целосно новиот GLA, кој носи значително поинаков изглед, поголеми димензии, многу повеќе технологија и широка понуда на електрични и хибридни погонски системи.
Новиот GLA е поставен на новата MMA платформа на Mercedes-Benz, која ја дели со новата CLA. За разлика од досегашната генерација, новиот компактен SUV од самиот почеток ќе биде достапен и како целосно електричен модел, но и со хибриден погон.
Дизајнерски, новиот GLA го следи најновиот визуелен правец на германскиот производител. Предниот дел добива нова, поголема „Iconic Grille“ решетка, која кај одредени изведби е осветлена. LED предните светла добиваат препознатлив графички мотив со ѕвезда, додека Multibeam LED светлата имаат дневни светла во форма на ѕвезда.
Профилот е почист и поаеродинамичен, со вовлечени рачки на вратите, нагласени пластични заштити околу долниот дел од каросеријата и поизразени задни крила. На задниот дел се забележуваат нови, покомпактни светла поврзани со тенка светлосна лента. Регистрациската табличка сега е поставена во задниот браник, со што петтата врата добива почист изглед.
Во споредба со досегашниот модел, новиот GLA е подолг за 155 милиметри, додека меѓуоскиното растојание е зголемено за 61 милиметар. Тоа директно се одразува и врз просторот во кабината.
Багажникот има волумен од 410 литри, што претставува зголемување од 70 литри. Со преклопување на задните седишта, капацитетот се зголемува на 1.400 литри. Електричните изведби добиваат и дополнителен преден багажник со волумен од 107 литри.
Внатрешноста во голема мера е преземена од новата CLA и е силно ориентирана кон дигитализацијата.
Стандардно, новиот GLA добива 10,25-инчен дигитален инструмент-панел и централен мултимедијален екран со дијагонала од 14 инчи. Со опционалниот MBUX Superscreen систем, пред совозачот се додава уште еден 14-инчен екран.
Преку дополнителниот екран ќе може да се пристапува до повеќе од 40 апликации, меѓу кои се YouTube и Disney+. Инфозабавниот систем користи нова генерација на MBUX со напреден виртуелен асистент и интеграција на вештачка интелигенција.
Електричната понуда ќе започне со GLA 200 Electric. Оваа изведба користи батерија со капацитет од 58 kWh и LFP технологија, како и електромотор поставен на задната оска.
Електромоторот развива 224 КС и 335 Nm вртежен момент. Забрзувањето од 0 до 100 км/ч трае 8,1 секунди, максималната брзина изнесува км/ч, а досегот според WLTP циклусот е од 394 до 447 километри.
GLA 200 Electric поддржува DC брзо полнење со моќност до 200 kW. Батеријата може да се наполни од 10 до 80 проценти за околу 20 минути, а десетминутно полнење може да обезбеди приближно 165 километри дополнителен досег.
Следен во понудата е GLA 250+ Electric. Тој добива електромотор со 272 КС и 335 Nm, како и поголема NMC батерија со капацитет од 85 kWh.
GLA 250+ забрзува од 0 до 100 km/h за 7,3 секунди и достигнува максимални 210 км/ч. Во зависност од конфигурацијата, WLTP досегот изнесува од 577 до дури 657 километри.
Благодарение на 800-волтната електрична архитектура, GLA 250+ поддржува DC полнење со моќност до 320 kW. За само десет минути, батеријата може да добие енергија доволна за приближно 270 километри дополнителен досег.
На врвот на електричната понуда ќе биде GLA 350 4MATIC Electric. Оваа изведба користи два електромотори и електричен погон на сите четири тркала.
Комбинираната моќност изнесува 354 КС, а максималниот вртежен момент е 515 Nm. Забрзувањето од 0 до 100 км/ч трае само 5,4 секунди, додека максималната брзина останува ограничена на 210 км/ч.
Поради дополнителниот електромотор и погонот на сите тркала, досегот е малку помал и изнесува од 555 до 643 километри според WLTP.
Mercedes-Benz најави и уште една електрична верзија која ќе пристигне во 2027 година и ќе користи NMC батерија со капацитет од 71 kWh.
Покрај електричните модели, новиот GLA ќе биде достапен и со хибридни погонски системи.
Хибридните изведби ќе користат 1,5-литарски турбо бензински мотор со четири цилиндри, комбиниран со електромотор од 30 КС. Електромоторот е интегриран во нов осумстепен автоматски менувач со двојна спојка, а системот користи 48-волтна електрична архитектура и батерија со капацитет од 1,3 kWh.
Mercedes-Benz засега не ги објави целосните спецификации, но се очекуваат изведби со приближно 193 КС и 220 КС комбинирана моќност, како и верзии со погон на предните или на сите четири тркала.
Новиот GLA ќе добие и MB.DRIVE Assist систем со напредни системи за помош при возење и полуавтономни функции.
Продажбата во Европа започнува наскоро, додека цените и целосната понуда за европските пазари ќе бидат објавени дополнително.
Со поголеми димензии, многу попространа кабина, до три големи екрани и електричен досег до 657 километри, новиот Mercedes-Benz GLA прави сериозен исчекор во однос на претходната генерација. Најважно е што Mercedes сега ги обединува електричните и хибридните изведби под едно име и со речиси идентичен дизајн.
