ТЕСТ: Mazda CX-80 3.3 e-Skyactiv D i-ACTIV AWD Homura Plus – Дваесеттина сантиметри прават огромна разлика!

Што добиваме со малку подолго меѓуоскино растојание и малку подолга каросерија? Па, по сè изгледа – многу!

Новата Mazda CX-60 не ни е непознат SUV. Досега во „наши раце“ поминале две верзии – едната со 3.3-литарскиот турбодизел, втората со моќен и ефикасен плаг-ин хибриден погон. Но денес сме тука да зборуваме за CX-80 – „поголемата сестра“ на CX-60.

И не, не е „постарата сестра“ – туку токму „поголемата сестра“. CX-80 добива околу 25 сантиметри плус во должина, но и 25 сантиметри подолго меѓуоскино растојание, а тоа многу ги менува работите. Мнооооогу.

Најважната разлика е во ентериерот

Најважната разлика е дека CX-80 доаѓа со три реда седишта, а уште поважно е дека нашата тестна верзија дојде со „капетански седишта“ во средниот ред. А тоа значи две засебни седишта со централна конзола меѓу нив, кои се прилагодуваат во сите насоки и доаѓаат со вентилација и греење.

И овие седишта се… Едноставно одлични. Проверивме. На подолг пат се исклучително комфорни и има сосем доволно простор за нозете и за главите на патниците. Всушност, тоа е и поентата, нели? Патниците не само што ќе седат и ќе патуваат комфорно, туку добиваат и свои контроли за клима-уредот, USB-C приклучоци и сета светлина на светот благодарение на стаклениот кров.

Плус, немојте да мислите дека на третиот ред е тесно. Во ред, не е ни од далеку толку комфорно и просторно како на капетанските седишта, но е повеќе од доволно просторно за деца или не-толку-високи возрасни.Она што е убаво е дека и третиот ред седишта добива свои држачи за чаши, отвори за вентилација и други секојдневно-практични моменти.

Инаку, на предните седишта е исто како во CX-60 – а тоа значи комфорно, просторно и навистина лесно за секојдневно користење. Онаму каде другите производители ги менуваат физичките контроли со дигитални, Mazda задржува физички интерфејс меѓу возачот и кокпитот. Се седи високо, комфорно и прегледно, а сè што ќе допрете е изработено од квалитетни материјали.

Во однос на багажниот простор, со третиот ред седишта во употреба, имате на располагање 258 литри багажен простор, но преклопете ги и добивате 566 литри кога вториот ред е поместен крајно наназад, односно 687 со вториот ред повлечен нанапред. Преклопете го и вториот ред и имате на располагање дури 1971 литар. Пештера.

Одличен 3.3-литарски турбодизел

Инаку, погонот ни е добро-познат. Одличниот 3.3-литарски лајт-хибриден турбодизел со шест цилиндри во линија се однесува исклучително рафинирано. Самиот мотор испорачува 254 коњски сили при 3750 вртежи во минута и одлични 550 Nm вртежен момент од 1500 вртежи во минута.

Со шестте цилиндри соработува и мал електромотор поставен меѓу моторот и менувачот кој испорачува дополнителни 17 коњски сили и 143 Nm вртежен момент, кои пак ја дополнително ја „пеглаат“ испораката на сила. Резултат на сето тоа е линеарен, моќен мотор кој за време на нашето тестирање трошеше околу 7 литри на 100 изминати километри!

Mazda CX-80 се покажа како доверлив, комфорен и прецизен автомобил за патување. Управувањето е прецизно и изненадувачки директно, а големиот SUV ја менува насоката со подготвеност која едноставно не ја очекуваме. Суспензијата одлично ја контролира масата на CX-80, а на отворен пат големиот SUV е на свое. Без разлика каде седите.

И каква е разликата? Па, огромна.

И тука ќе ја завршиме дискусијата за CX-80. Тешко е да се најдат забелешки, навистина. Кога сите други брендови како да се кријат од дизелите, Mazda покажува што и како знае. А знае. Моќниот турбодизел е одличен партнер на големиот, комфорен SUV. Дваесеттина сантиметри навистина прават огромна разлика.

Спецификации

Фотографии