Врескачки атмосферец, мануелен менувач и отворен кров. Може ли да биде подобро?
Пред само неколку моменти, Porsche го претстави новиот 911 GT3 S/C. Ако сакаме да бидеме кратки, ќе кажеме дека 911 GT3 Touring во кабрио изведба, но вистината е дека е многу повеќе од тоа.
А зошто? Па одговорот на тоа прашање можеме да го гледаме од неколку аспекти. Првиот е дека инженерите посветиле многу, многу, многу внимание на намалување на тежината – од Porschе кажуваат дека S/C не е значително потежок од 911 GT3 Touring, и покрај механизмот за електричниот кров. Според Porsche, 911 GT3 S/C тежи 1507 килограми – околу 40 килограми повеќе од 911 GT3 Touring.
Сето тоа се должи на многуте олеснети компоненти. Скоро сите компоненти од каросеријата се од карбон, потоа тука се карбон-керамичките (PCCB во Porsche-speak) сопирачки, магнезиумски тркала, карбонски стабилизатори, супер-лесни карбонски седишта и многу, многу повеќе.
И сето тоа гарантира уживање. А ќе уживате, бидејќи под задниот поклопец се крие 4-литарскиот атмосферски шест-цилиндерски боксер кој „врти“ до 9000 вртежи во минута и испорачува 510 коњски сили и 450 Nm вртежен момент.
Она што е изненадување е дека Porsche нема да го ограничи производството на 911 GT3 S/C. За оние кои сакаат нешто нијанса поексклузивно, Porsche Exclusive Manufaktur го нуди Street Style пакетот кој вклучува графички елементи на крилата и на страните, но вистинскиот хит е ентериерот – црвениот ентериер е радикален и храбар, и иако можеби нема да биде по сечиј вкус, ние ќе кажеме дека совршено му одговара на еден ваков екстовертен автомобил.
