Voyah е дел од портфолиото на кинескиот гигант Dongfeng, а македонскиот застапник ABC Brother најавува дека од идната година моделите на овој бренд ќе пристигнат во Македонија.
Македонскиот застапник и импортер на возилата на кинескиот гигант Dongfeng најави дека од следната година, на нашиот пазар ќе пристигнат и возилата на премум брендот на оваа групација – Voyah. Брендот е веќе присутен во неколку земји во Европа – веќе се нуди во Италија, Норвешка, Чешката Република, Холандија, Шпанија, Португалија, Финска… И со задоволство можеме да најавиме дека ќе пристигне и кај нас.
Инаку, Voyah е бренд кој се концентрира на таканаречени New Energy Vehicles – односно електрични и плаг-ин хибридни автомобили и SUV модели. Според најавите, во Македонија треба да пристигнат Voyah Courage, Voyah Free REEV и Voyah Dream.
Courage е компактен електричен кросовер кој ветува автономија до 500 километри и многу опрема.
Над него е луксузниот (и голем) Voyah Free REEV (Range-Extended Electric Vehicle) кој нуди врвни технологии и многу луксуз, како и автономија на струја до околу 300 километри и вкупна автономија која надминува 1400 километри.
Интересен треба да биде и Voyah Dream, големиот луксузен миниван кој проаѓа до 700 километри и нуди вистински премиум транспорт за вкупно 7 патници. Voyah Dream ќе се нуди како електрично возило, но и како плаг-ин хибрид.
Од ABC Brother гордо кажуваат дека возилата се опремени со најнапредната Huawei технологија: интелигентни системи за автономно возење, HarmonyOS smart cockpit и ултрабрзо полнење на 800V платформа. Дополнително, ги исполнуваат строгите Euro NCAP стандарди за безбедност – Courage веќе освои максимални пет ѕвездички.
За „мирна глава“, сите возила ќе имаат 5-годишна гаранција на возилото, како и 8-годишна гаранција на батеријата, електромоторот и бензинскиот мотор.
Според најавите, Voyah Courage треба да пристигне на почетокот на следната година, додека Voyah Free REEV ќе пристигне нешто подоцна. Понатаму ќе биде проширено портфолиото и со други модели.
