Жирито кое го одбира Европскиот Автомобил на Годината ја објави конечната листа од седум финалисти кои ќе се борат за престижната титула за 2026.
Жирито кое брои вкупно 60 членови од 23 Европски земји, ја скрати широката листа од 35 потенцијални кандидати на само седум финалисти кои имаат најголем изглед да ја освојат престижната награда. Всушност, веќе најавија дека победникот ќе биде прогласен на 9-ти Јануари, на Бриселското Интернационално Мотор Шоу.
И да не должиме многу-многу, финалистите кои ќе се борат за титулата се: Citroën C5 Aircross, Dacia Bigster, Fiat Grande Panda, Kia EV4, Mercedes-Benz CLA, Renault 4 и Skoda Elroq. Интересно е што сите возила се или електрифицирани, или целосно-електрични, а некои веќе ги познаваме. Неодамна се запознавме со големиот Citroën C5 Aircross на официјалната презентација на Мајорка, а Fiat Grande Panda и Dacia Bigster се веќе пристигнати во Македонија. Се надеваме дека наскоро ќе имаме можност да ги пробаме сите овие автомобили.
Жирито започнува со последните темелни тестирања на финалистите и ќе гласаат за најдобриот автомобил кој се нуди во Европа. За самиот крај е закажано заедничко тестирање во Шпанија, пред финалното гласање. Секој член на жирито располага со вкупно 25 поени кои треба да ги подели меѓу финалистите и мора да гласа за најмалку пет од седумте кандидати.
Конкуренцијата годинава е навистина силна, со нетрпение ги очекуваме резултатите.
