Моделот претставува поелегантна верзија на веќе познатиот MC20 и ќе биде достапен во купе и кабриолет верзија.
Под хаубата, MCPURA го задржува 3-литарскиот твин-турбо V6 кој произведува 630 коњски сили и 720 Nm вртежен момент.
Суперавтомобилот забрзува од 0 до 100 километри на час за само 2,9 секунди, додека максималната брзина изнесува 325 километри на час кај купе верзијата, односно 320 километри на час кај кабриолетот.
Што се однесува до надворешниот дизајн, направени се мали и суптилни промени во однос на претходникот MC20. Предната маска и разделникот се благо редизајнирани, а задниот дифузер добива нов изглед со интегрираните аеродинамични елементи околу издувните цевки. На задниот дел е додаден и поизразен спојлер, додека по целата каросерија се поставени специјални ознаки.
За MCPURA беа создадени нови ексклузивни бои како портокаловата „Devil Orange“ и сино-зелената „Ai Aqua Rainbow“, која има мат завршница кај купето, односно сјајна при изведбата на Cielo кабриолетот.
Внатрешните елементи се украсени со уникатни логоа, а праговите на вратите се дизајнирани специјално за овој модел. Воланот влече инспирација од тркачките автомобили и доаѓа со интегрирани светла за укажување на оптимално време за менување на брзини.
Моделот стандардно доаѓа со шест звучници, но како опција се нуди и премиум аудио систем од Sonus Faber со 12 звучници.
Цената за Maserati MCPURA сè уште не е официјално објавена, но очекуваме да биде нешто повисока од онаа за MC20.
