Модерната „неофицијална” преработка на легендарната Lancia 037 доаѓа со нова технологија и погон на сите тркала.
Kimera Evo38 е продолжение на Evo37 од 2021 година, со тоа што сега добива погон на сите тркала и зголемена моќност. Моделот испорачува скоро 600 коњски сили до двете оски преку шест-брзински мануелен менувач. За понатаму постојат планови за продажба на Evo38 и со електронски активиран секвенцијален менувач.
Автомобилот тежи 1100 килограми благодарејќи на шасијата која е изработена од лесни материјали како карбон и титаниум. Тој е опремен со електрохидрауличен диференцијал што може да се контролира одвнатре, дозволувајќи му на возачот да избере колкава моќност ќе добијат тркалата. Суспензијата е исто така изменета во споредба со 037 и сега има електронски контролирани амортизери заедно со систем за подигање.
Од Kimera планираат да го донесат Evo38 на саемот за автомобили во Женева што ќе се одржи следниот месец, а производството на 38 единици е планирано да започне подоцна оваа година. Деталите за цените не се објавени, но вреди да се спомне дека Evo037 беше понуден во 37 примероци по цена од 480.000 евра.
