Русија има своја алтернатива на супер-луксузните Rolls Royce Cullinan, Bentley Bentayga и Range Rover – а тоа е огромниот Aurus Komendant.
Големиот руски луксузен SUV е дизајниран да понуди „беспрекорен комфор при секое патување“, а производителот Aurus опишува дека има „мажествен и монументален екстериер“. Ние мислиме дека личи на Rolls Royce Cullinan однапред, односно на Bentley Bentayga одзади – но ако веќе некого копирате…
Komendant е придвижуван од хибридизиран 4.4-литарски твин-турбо V8 кој испорачува 598 коњски сили и моќни 880 Nm вртежен момент, кои се пренесуваат кон сите четири тркала преку 9-брзински автоматски менувач. Оваа конфигурација му овозможува на 3235 килограми (!!) тешкиот Komendant да забрза до 100 километри на час за 6.5 секунди и да достигне максимални 220 километри на час. Во ред, значи нема да руши брзински рекорди.
Сепак, ако перформансите не се импресивни, луксузот навистина е! Од Aurus гордо кажуваат дека купувачите ќе можат да го персонализираат својот Komendant преку уникатни бои, специјално гравирање на праговите и везени детали на наслоните за глава.
Секако, тука се и дрвените елементи во кабината и уникатните материјали кои купувачите ќе можат да ги изберат. Според Aurus, достапни ќе бидат Popular Black, Silver Burch Burl и Dark Brown Ash дрвените декоративни елементи, а тука се и супер-фината Nappa кожа и металните акценти во кабината. Секако, ги забележуваме и неизбежните дигитални инструменти и големиот инфозабавен уред.
Во задниот ред се вградени две индивидуални седишта со загревање, ладење и систем за масажа, а меѓу нив е поставена централна конзола која има вградени масички и мини-бар со вграден фрижидер. Секако, и пред задните седишта има дигитални екрани наменети за забава и информирање.
Цената на Komendant? Во моментов цените започнуваат од 33.7 милиони Рубљи, односно малку под 600.000 Евра.
