Врвниот Cayenne има 640 коњски сили – а сето тоа му овозможува врвни атлетски перформанси.
Благодарение на моќниот 4-литарски твин-турбо V8 кој испорачува 640 коњски сили и 850 Nm вртежен момент (+ 90 коњски сили и + 80 Nm во однос на Cayenne Coupe Turbo), моќниот Coupe-SUV забрзува до 100 километри на час за само 3.3 секунди и постигнува максимални 300 километри на час.
Cayenne Turbo GT добива ревидирани компоненти внатре во моторот, ревидирани турбополначи, како и нов систем за дишење. Дел од приказната е и полесен титаниумски издувен систем. Силата се пренесува кон сите четири тркала преку 8-брзински Tiptronic автоматски менувач кој е рекалибриран за уште побрзо да ги менува брзините.
Cayenne Turbo GT е поблиску до подлогата за цели 17 милиметри, а воздушната суспензија е до 15% поцврста. Секако, ревидирани се системите за контрола на стабилноста, адаптивната шасија, управувањето и уште многу други ситници.
Предните тркала се пошироки за подиректно управување, а моќниот SUV добива и ревидирани карбон-композитни сопирачки. Cayenne Turbo GT ќе го препознаете по дискретно редизајнираниот преден браник со поголеми отвори за воздух, 22-инчните тркала со дискретно проширени крила и уште неколку ситни естетски додатоци. Cayenne Turbo GT добива и специјален заден спојлер, како и карбонски дифузер.
Кабината е обвиена во алкантара, а добива и спортски седишта кои се нагодуваат во 8 насоки, како и нов Porsche Communication Managemnet (PCM) систем со нов интерфејс и нова оперативна логика и целосна интеграција со Apple CarPlay и Android Auto.
