full screen background image
Search

ТЕСТ: Alfa Romeo Giulietta 1.4 TB 120 – Belissima turbo benzina!

Италијанците секогаш ги правеле работите некако… Поинакви! Подобри. Е сега – зошто мислиме дека Giulietta во комбинација со 1.4-литарскиот турбо-бензинец  е скриен скапоцен камен во понудата на Alfa Romeo?

Веќе добро ја познаваме Giulietta – пред околу година и половина се појави на нашите страници опремена со 1.6-литарки турбодизел и уште тогаш ни остави позитивни впечатоци. Да, Giulietta не е најновиот модел на пазарот – всушност се продава веќе подолго време – но низ годините изгради репутација на забавен, доверлив и неизмерно шармантен автомобил кој заслужени ги освои симпатиите на многумина.

Денес повторно ќе зборуваме за Alfa Romeo Giulietta, но овој пат за Giulietta опремена со основниот, 1.4-литарски турбо-бензинец кој испорачува 120 коњски сили. И не само тоа, туку ќе се обидеме да објасниме зошто токму оваа комбинација е скриениот скапоцен камен во понудата на италијанскиот бренд.

Препознатлив Alfa Romeo дизајн.

Хечбекот кој е секојдневна слика на нашите улици сè уште го привлекува вниманието. Ни се допаѓа црвената боја, а ни се допаѓаат и деталите – широките колкови и ставот кој на Giulietta ѝ овозможува да изгледа како да е подготвена да скокне.

На предниот дел сè уште се истакнува карактеристичната Alfa Romeo маска, додека профилот е дури купеовски благодарение на скриените рачки на задните врати. Сепак, најверојатно би одбрале број-два поголеми тркала за поубаво да бидат пополнети крилата и ставот да е уште подинамичен и поспортски.

Кабина каде примарниот фокус е кон уживањето во возењето!

Влегуваме внатре во Giulietta и нè пречекува комфорна и изненадувачки просторна кабина. Како што напоменавме и минатиот пат – атмосферата во кабината на Giulietta е типично-италијанска – седењето е ниско, седиштата „ве гушкаат“ и најважните команди за уживање – управувачот, менувачот и педалите се одлично поставени. Управувачот одлично „лежи“ но вистинскиот шампион тука е менувачот, односно рачката од менувачот – „топката“ е едноставно фантастична.

Поврзано:   Manhart ја засили Alfa Romeo Giulia Quadrifoglio на 653 коњски сили!

Пред возачот се поставени јасните аналогни инструменти, додека на централната конзола вниманието го привлекува новиот мултимедијален уред кој овозможува лесно поврзување со мобилен телефон, но и Android Auto и Apple CarPlay функционалности. Под него се поставени контролите за клима уредот, а пред менувачот е и DNA селекторот, кој вистински ја трансформира Giulietta.

Повторно ќе спомнеме дека на задната клупа е како во скоро сите други автомобили од оваа класа – има простор за двајца, во „шкрипец“ и за тројца, но не би препорачале таква конфигурација на подолги релации. И навистина – тоа е тоа. Giulietta е одлично-подготвена да ја игра улогата на практичен и комфорен семеен хечбек. Забелешки на ентериерот? Имаме, секако – на Giulietta веќе „ѝ се познаваат годините“ во кабината – некои од материјалите се цврсти и веќе има нови трендови, и би сакале уште малку прилагодување на управувачот по височина и длабочина, но на Giulietta не ѝ недостасува ништо важно.

Вистинското изненадување е под хаубата…

Сепак, Giulietta е во вистинско светло кога ќе посакате да ги оставите здодевните „семејни обврски“ настрана и да уживате во возењето. Тогаш на DNA селекторот одбирате D и Giulietta се трансформира. Малиот 1.4-литарски турбо-бензинец цели високо, високо над својата класа и како да испорачува повеќе од декларираните 120 коњски сили и 215 Nm вртежен момент.

Подготвеноста со која Giulietta реагира на секое притискање на педалата за гас едноставно ги засенува конкурентите, а звукот кој излегува од задниот дел е изненадувачки забавен. Во време на анемични, дури и би рекле задушени мотори кои се сè поанонимни само за да се задоволат сè построгите еко-норми, ваквиот жив и вокален турбо-бензинец станува вистинска реткост. Браво Alfa Romeo! Belissima! Официјалните податоци говорат за забрзување до 100 километри на час за 9.4 секунди и максимални 195 километри на час – но во возење Giulietta како да е… Побрза!

Giulietta ги наградува талентираните возачи, а аматерите ги прави да изгледаат подобро. Giulietta е онаа вистинската кога DNA селекторот е во D – тогаш и управувањето е подинамично и Giulietta флуидно се движи од свиок во свиок, верно ги следи инструкциите и изнудува онакви добри, од-уво-до-уво насмевки. А бидејќи во предниот дел нема тежок турбодизел кој само ќе го влече носот, туку лесен бензинец, Giulietta се чувствува остра, прецизна и подготвена да го игра оној танц од еден свиок во друг.

Поврзано:   Alfa Romeo ќе лансира по еден нов модел до 2026, а потоа ќе стане електричен бренд

А ако мислите дека сето тоа резултира со „пенали“ на бензинските пумпи – верувајте, ќе згрешите! Потрошувачката лесно може да порасне, секако – но бидете цивилизирани дами и господа, и индикаторот нема да надмине 8.5 литри на 100 изминати километри.

Но зошто Giulietta со 1.4-литарскиот турбо-бензинец е скриен скапоцен камен во понудата на Alfa Romeo?

И сега, ајде да го одговориме прашањето – зошто Giulietta со 1.4-литарскиот турбо-бензинец со скриениот скапоцен камен во понудата на Alfa Romeo? Затоа што оваа комбинација нуди интересна златна средина – перформансите се повеќе од адекватни и звукот е забавен, а од друга страна лесно ги исполнува секојдневните задачи на практичен хечбек. И уште кога ќе ја земеме цената предвид… Скапоцен камен, слушајте нè!

Спецификации

Модел: Alfa Romeo Giulietta 1.4 TB 120 Super
Мотор: 1.4-литарски турбо-бензинец, 4 цилиндри
Моќност: 120 коњски сили / 5000 вртежи во минута
Вртежен Момент: 215 Nm / 2500 вртежи во минута
Менувач: Мануелен, 6 брзини
0-100 км/ч: 9.4 секунди
Максимална Брзина: 195 километри на час
Должина: 4351 mm
Ширина: 1798 mm (без странични ретровизори)
Висина: 1465 mm
Тежина: 1280 килограми
Меѓуоскино Растојание: 2634 mm
Багажен Простор: 350 литри
Потрошувачка: 8.4 литри на 100 километри (измерена, градска)
Цена на основниот модел: Alfa Romeo Giulietta 1.4 TB 120 – 14.990 Евра
Цена на тестираниот модел: Alfa Romeo Giulietta 1.4 TB 120  – 18.759 Евра
НАПОМЕНА: Во моментот на објавувањето на овој тест, конкретното возило се нуди по специјална цена од 16.507 Евра.
Повеќе Информации: Alfaromeo.mk

Димензии

Фотографии



Алфа и Омега на CARclub. Играчките остануваат, само стануваат поскапи.