Големиот теренец на Land Rover освои максимални пет ѕвездички на ригорозните Euro NCAP тестови за безбедност на автомобилите.
Новиот Defender продолжува да се наметнува како робустен и издржлив – но и безбеден – теренец. Euro NCAP објави дека Land Rover Defender освои максимални пет ѕвездички на строгите тестирања, но и дека има особено добри резултати во сегментот за заштита на деца-патници – дури 85%, како и 79% за системи за активна асистенција.
Кај Defender се достапни многу системи за активна и пасивна безбедност – од систем за автоматско итно сопирање кој препознава пешаци и велосипедисти, преку систем за следење на слепата точка, па сè до систем за следење на коловозната лента, 3D-камери, адаптивен темпомат, систем за следење на состојбата на возачот и многу, многу повеќе.
Defender веќе има освоено скоро 30-тина различни интернационални признанија, а врвните резултати на Euro NCAP се уште една потврда за безбедноста на големиот британски SUV. За ваквите одлични резултати, Ник Роџерс – извршниот директор за производно инженерство – во JLR изјави: „Од моментот кога започнавме да го создаваме новиот Defender, бевме опседнати со функционалната безбедност и заштита на патниците и другите учесници во сообраќајот. Намерата ни беше да создадеме возило што ќе биде досега најспособниот и најистрајниот Land Rover, со безбедносни карактеристики кои вистински го подобруваат искуството на возачот. Неверојатна чест е да го добиеме ова признание од Euro NCAP, пет ѕвездички за нашиот нов Defender“.
Ние веќе го возевме новиот Defender – нашиот тест можете да го прочитате тука.
