Според WLTP протоколите, новиот Peugeot 3008 GT Hybrid4 може да троши само 1.3 литри бензин на 100 изминати километри и да има емисија на CO2 од само 29 грама на изминат километар.
Хибридниот 3008 GT Hybrid4 комбинира 200-коњски PureTech турбо-бензинец со два електромотори. Едниот електромотор е поврзан на менувачот, а вториот директно на задната оска. Системската моќност е 300 коњски сили, а тоа му овозможува на плаг-ин хибридниот SUV да забрза до 100 километри на час за само 5.9 секунди.
Но она што е уште поимпресивно е автономијата на електрична енергија. Благодарение на капацитетот од 13.2 kWh, плаг-ин хибирдниот 3008 GT Hybrid 4 може да помине до 59 километри само на електрична енергија – а тоа го прави еден од најчистите автомобили кои во моментов се нудат на пазарот. Полнењето (со соодветен полнач) трае 1 час и 45 минути – и вие сте повторно подготвени за возење на електрична енергија.
Peugeot подготвува уште една варијанта на 3008 Hybrid – која ќе комбинира 180-коњски бензинец со само еден, 110-коњски електромотор поставен на предните тркала. Оваа верзија ќе биде со погон само на предните тркала и ќе има вкупна системска моќност од 225 коњски сили.
Плаг-ин хибридниот Peugeot 3008 GT Hybrid4 е веќе достапен за нарачка во Франција, а од Октомври ќе биде достапен и во остатокот од Европа.