ТЕСТ: Škoda Fabia 1.0 TSI 95 Ambition – Не мора да значи дека разумното е здодевно

Чешкиот бренд неодамна ја освежи Fabia, а токму тоа беше причината ние да поминеме неколку дена со градскиот хечбек, опремен со одличен 1-литарски TSI турбо-бензинец со 95 коњски сили.

Секогаш кога зборуваме за Škoda, тешко е да го избегнеме зборот рационалност. Пристапот на Škoda кон нештата е токму таков – рационален. Нема екстремни дизајнерски насоки, нема радикални одлуки – Škoda е тука да понуди одлична вредност за вложените пари од една страна, и привлечен и ненаметлив дизајн од другата страна. За оние оние кои го ценат овој пристап и успеваат да го препознаат, сосем е јасно зошто продажбата на чешкиот огранок на Volkswagen групацијата непрестајно расте.

Дизајнот ја отсликува рационалноста на Fabia

Fabia е одлично олицетворение на пристапот за рационалност. Со неодамнешното освежување Fabia доби дискретно редизајниран лик (кој воглавно се должи на одличните LED предни светла), неколку затегнати линии, нови бои и нови дизајни на тркалата – но во суштина, погодената формула не се менува. Fabia веднаш ќе ја препознаете како Fabia и нема да ја измешате со ниту еден модел – препознатливата, практична форма и чистите линии се одлики на Škoda, па тука нема многу-многу девијација од препознатливите насоки.

Сепак, ќе напоменеме дека навистина ни се допаѓаат новите LED светла – нудат одлично осветлување и се вистинско освежување во класта, и се надеваме дека сè повеќе производители ќе започнат да ги нудат, иако се релативно скапа дополнителна опрема (барем за оваа класа). Ни се допадна и сината боја на нашиот тест-автомобил – Fabia одлично изгледа во вакви храбри бои.

Освежена кабина, каде практичноста го има главниот збор

Како и екстериерот, и кабината добива освежување. Ентериерот добива нови материјали и нови дизајни за седиштата, редизајнирани (и помодерни) инструменти, а сега и патниците на задната клупа можат да добијат USB приклучоци за полнење мобилни телефони – одличен и практичен детал. Всушност, приказната за практичноста продолжува – ги добивате сите оние Simply Clever додатоци по кои е позната Škoda, а кабината е меѓу најпространите во класата. Некои од пластиките не се најмеки, но сепак мораме да имаме во предвид во кој сегмент припаѓа Fabia.

Од друга страна, има мал милион места за одлагање ситници и дребулии – големи џебови во вратите, пред менувачот во централната конзола, а добивате и прилично голем багажник – достапни се 340 литри, кои нараснуваат на одлични 1324 литри кога се соборени задните седишта. Ни се допаднаа и комфорните седишта, а ние би додале и централен наслон за раце меѓу возачкото и совозачкото седиште. Уште немаме закон за ова?

Од-ли-чен 1-литарски турбо-бензинец

Вистинскиот скапоцен камен е освежениот 1-литарскиот TSI турбо-бензинец. Малиот три-цилиндерски „турбаш“ испорачува 95 коњски сили при 5000 вртежи во минута и 160 Nm вртежен момент од само 1800 вртежи во минута. Резултат на ова е еластичност која дури можеме да кажеме дека е неочекувана. Вистинско задоволство е да се користи прецизниот менувач и „да се бркаат перформанси“. Тука е неизбежниот звук карактеристичен за мал три-цилиндерски мотор, но тој некако му прилега на градски автомобил.

Перформансите не се за занемарување – „стотче“ се постигнува за 10.8 секунди, додека максималната брзина е 184 километри на час – повеќе од доволно за драг-тркање од семафор до семафор. Секако, ниту економичноста не е за занемарување – ние измеривме просечна потрошувачка од околу 7 литри на 100 километри во градски услови.

Во град, Fabia се однесува максимално коректно – одличната прегледност и правилната форма гарантираат лесно маневрирање низ тесните градски улици. Суспензијата е нагодена да биде ориентирана повеќе кон конфор и таквиот пристап одлично му прилега на градски автомобил. Едноставно, влезете во Fabia и уживајте во лесното возење како во град, така и на автопат каде Fabia се покажа како доверлив сопатник. Повторно, благодарение на турбо-бензинецот лесно се одржуваат и повисоки брзини без пренагласена бучавост, а олеснето е и претекнувањето.

Конкурентност преку играчки и опрема

Сегментот на возила во кој припаѓа Fabia е конкурентен – ваквите возила ги купуваат помлади купувачи кои повеќе се заинтересирани за хај-тек играчки отколку за мотори и перформанси. Ниту тука Fabia не заостанува зад конкурентите – тоа се должи како на достапните варијанти и опрема (како што се веќе-споменатите LED предни светла, но и одличниот DSG менувач со двојна спојка кој може да се добие со доплата), така и на мултимедијалните уреди. Нашиот тест-автомобил дојде со мултимедијален уред со дијагонала од 6.5 инчи и можност за Android Auto и Apple CarPlay поврзување. Помладите купувачи сакаат да го поврзат својот паметен телефон со својот автомобил и сакаат сето тоа да биде практично и корисно – и токму тоа го добиваат. Дел од дополнителната опрема се и Maxi Dot борд компјутер, управувач со команди за радиото обложен во кожа, металик бојата и уште некои додатоци.

Škoda Fabia не ја крие својата рационалност – туку искрено и гордо ја истакнува!

Всушност, можеме да кажеме дека токму тоа е картата со која „игра“ Škoda – купувачите ќе го добијат токму она кое го очекуваат. Ќе добијат зрел автомобил кој наместо „со желба да биде кул“ да ја крие својата рационалност,  напротив – гордо го истакнува својот практичен и размислен пристап кон нештата. Дали е Fabia вистинскиот избор за секого? Не, но ниту еден автомобил не е за секого – но тие кои ќе ја одберат Fabia ќе добијат автомобил со кој секојдневнието станува попрактично и полесно.

Димензии

Спецификации

Фотографии

Фотографија: Дејан Маликовски