full screen background image
Search

РЕТРОСПЕКТИВА: Porsche 911 – Добредојде 964!

Дали знаевте дека Porsche 911 веќе има седум генерации зад себе? 27-ми ноември ќе биде официјален почеток на најновата, осма генерација на овој легендарен спортски бренд. Додека ги чекаме официјалните статистики и фотографии, да се потсетиме на третата генерација на Porsche 911 – 964.

Голем број на критичари на Porsche ја гледаа 964 генерацијата на 911 само како 911 930 со интегрирани браници. Делумно, беа во право бидејќи формата остана речиси идентична како и на претходниот модел со ситни козметички затегнувања. Но, главните промени кај третата генерација на 911 беа „под кожата“ – 85% од составните делови беа нови!

964 започна да се произведува во 1988-мата година. Како доказ за новитетите „под кожа“, Porsche за прв пат нуди погон на 4 тркала во 911 моделот. Тоа не е било кој погон на 4 тркала – се работи за поедноставена верзија системот од супер-спортскиот Porsche 959, автомобил за кој владее општа согласност дека бил произведен 10-тина години прерано поради користените технологии. Така, се раѓаат Porsche Carrera 4 и Carrera 2 (соодветно на бројот на погонувани тркала). Овие основни верзии имаат нови мотори со зголемени зафатнини од 3.6 литри и моќност од 250 коњски сили. Новина кај погонот се и двете свеќички по цилиндер за подобро палење на горивото, како и Tiptronic менувачот.

Покрај веќе вообичаените 911 Cabriolet и 911 Targa, во третата генерација се појавуваат и неколку лимитирани едиции: 911 Jubilee и 911 Speedster. 911 Jubilee симболично се произведува во 911 примероци, има проширени предни и задни крила, 17-инчните тркала од 911 Turbo, погон преземен од Carrera 4 и прекрасна Viola Metallic виолетова боја комбинирана со Rubicon сив кожен ентериер. Истата, 1993 година е претставен и 911 Speedster – произведен во 930 „обични“ примероци и уште 15 ексклузивни примероци кои се базирани на 911 Turbo шасијата.

Поврзано:   ПАРИЗ 2018: Porsche 911 Speedster оди во сериско производство!

Кога сме кај 911 Turbo, под задниот поклопец се „криел“ 3.3 литарскиот мотор, за подоцна зафатнината да нарасне на 3.6 литри и 360 коњски сили. Новитет е и претставувањето на 911 Turbo S со 381 коњски сили. Производството траело само 6 години (наспроти 16 години за претходната генерација) и биле произведени 63.762 примероци од 964 генерацијата на Porsche 911.



Алфа и Омега на CARclub. Играчките остануваат, само стануваат поскапи.