Audi утринава ги објави сите детали околу нивниот најмал спортист – новиот Audi S1, односно S1 Sporback!
„Големата тајна“ на Audi беше токму спортската верзија на најмалиот член на Германското семејство. Освен што нуди спортски перформанси и агресивен дизајн, S1 го покажува и фејслифтот на A1.
Но, тоа и не е толку важно имајќи го во предвид она што го нуди S1. Под поклопецот се крие четири-цилиндричниот турбо мотор со зафатнина од 2 литри кој испорачува 230 коњски сили и 370 Nm вртежен момент! Со оглед на големината и тежината на S1 ова делува навистина импресивно – забрзувањето до 100 километри на час трае 5.8 секунди (односно 5.9 секунди ако одберете Sportback) а максималната брзина е електронски ограничена на 250 километри на час.
Но, тоа не е сè – 230-те коњски сили ќе бидат пренесени на сите четири тркала благодарение на quattro погонот и 6-степениот мануелен менувач. Предниот дел го одликуваат Xenon Plus светлата, а задниот дел е украсен со нови LED задни светлосни групи. Позади предните тркала се кријат 310-милиметарски дискови врз кои гордо стојат црвени шепи кои го носат S1 логото. За во внатрешноста, Audi одбра црни материјали со сиви детали, метални педали и спортски седишта.
Цените во Германија ќе започнуваат од 29.950 евра за S1, односно 30.800 за S1 Sportback.
