Конечно ја имавме можноста да седнеме зад воланот на новиот SUV на Mazda, и по неколкуте дена поминати заедно, излеговме изненадени и импресионирани.
Mazda имаше малку турбулентен период – по „разводот“ со Ford пред неколку години, Јапонскиот бренд како да ја откри својата втора младост и се впушти во повторно пронаоѓање на својот идентитет и позиција на пазарот.
По неколкуте дена поминати со CX-5, можам без никаква резерва да кажам дека Mazda повторно ги пронајде своите харизма и шарм, но не запре само тука, туку храбро чекори кон технолошките иновации и се обидува да се постави на самиот врв меѓу конкуренцијата.
Она што е веднаш забележливо е свежиот и храбар дизајн на CX-5! Овој компактен, фамилијарен SUV е првиот модел на Mazda кај кој гордо е изразен KODO дизајнерскиот јазик на брендот. Mazda го опишува KODO како „Душата на Движењето“, а барем во моите очи, CX-5 одлично го носи овој опис. Дури и кога не е во движење, CX-5 изгледа подготвен да нападне и да граби по сите услови и терени – предниот дел особено привлекува благодарение на широкиот централен отвор за воздух и издолжените предни светлосни структури кои на автомобилот му наметнуваат одлична доза на спортска агресивност.
Истите спортски линии продолжуваат и по страните на CX-5, каде високо-поставениот долен раб на прозорците оддава чувство на безбедност и доминантност, а задниот дел е успешно комплетиран со задните светлосни структури меѓу кои гордо стои знакот на Mazda. Гледано од страна, опаѓачкиот крај на горниот раб на прозорците визуелно го снижува автомобилот и дополнително го истакнува агресивниот и подготвен карактер.
Во внатрешноста ме пречекува ентериер кој е привлечен уште на првиот поглед. Меѓу Јапонските брендови секогаш се проткајувало чувство дека прават квалитетни, но по малку стерилни ентериери. Со задоволство можам да кажам дека тоа чувство кај CX-5 е целосно избегнато. Ентериерот е дизајниран привлечно и модерно, а материјалите кои се користени, освен на некои места, насекаде се квалитетни и меки на допир па соодветно на тоа оддаваат чувство кое сме навикнати да го очекуваме кај Германските производители.
Централно поставената конзола изгледа привлечно, а инструментите се читки и прегледни. Ергономијата е на задоволително ниво, и по малата крива на учење возачот лесно се снаоѓа со сите контроли и инструменти. Управувачот е особено комфорен и практичен со сите контроли кои се на него поставени, а единствената забелешка која ја имаме е на седиштата, на кои на долниот дел им недостасува малку странична поддршка, и би сакале уште малку можност за нагодување на управувачот по длабочина.
Она што има повеќе од доволно е простор за возачот, совозачот и патниците. Возачот и совозачот седат повеќе од комфорно, а на патниците на задната клупа нема да им недостасува простор во ниедна насока.
На пат, Mazda CX-5 продолжува да изненадува со директното и прецизно управување. Покрај тоа што се работи за SUV, сепак Mazda CX-5 нуди прилично голема доза на спортско уживање. Во ред, не е малиот MX-5, но сепак управувањето е директно, прецизно и пренесува навистина многу информации од подлогата. Лесно може да се постави автомобилот на патот, па соодветно на тоа и уживањето кое го нуди е на ниво повисоко од она на кое сме навикнати кај ваквите автомобили. Автоматскиот менувач работи прилично мирно и менувањето на брзини е скоро неприметно, а постои и режим за мануелно менување, но и во тој случај менувачот сам ќе отиде степен подолу или погоре доколку забележи дека има потреба од тоа. Би сакале малку повеќе контрола, но сепак тука се работи за SUV возило, а не за спортски автомобил.
Во градски услови, CX-5 сосем лесно маневрира низ метежот а паркирањето е лесно благодарение на паркинг сензорите. Прегледноста е на врвот во класата благодарение на големите стаклени површини, па истовремено лесно е да се проценат рабовите на автомобилот при маневри низ тесните Скопски улици.
Во услови кога ги напуштивме асфалтираните патишта, CX-5 сосем примерно ги совлада условите на теренот. Секако, сигурни сме дека возачите на CX-5 нема редовно да возат по калливи услови, но добро е да се знае дека автомобилот е подготвен да се справи со предизвиците.
Кога веќе зборуваме за патувањето, да позборуваме и за практичноста – CX-5 може да се пофали со навистина голем багажен простор со капацитет од 503 литри и иновативна преграда на багажниот простор која се поврзува со петтата врата и се отвора при отворање на багажникот, па пристапот е лесен и внесувањето на товар дополнително е олеснето благодарение на нискиот раб.
Сега веќе можеме да зборуваме за опремата, а таа е навистина богата. Нашиот тестен автомобил дојде опремен со автоматски менувач, автоматски двозонски клима уред, предни и задни паркинг сензори, автоматски ксенонски светла кои ја следат насоката на движење на возилото, одличен мултимедијален систем со TomTom навигација, Bluetooth и гласовна контрола, цела лепеза на безбедносни системи меѓу кои можеме да ги вброиме веќе очекуваните ABS и ESP системи, но и RVM (Rear Vehicle Monitoring) системот кој предупредува доколку има возило во мртвата точка, LDW (Lane Departure Warning) системот кој ја следи насоката на движењето на автомобилот меѓу две ленти и предупредува доколку примети неочекувано напуштање на траекторијата, електрично преклопливи ретровизори, и уште многу, многу повеќе.
Моторот со кој беше опремен нашиот тестен автомобил е новиот 2.2-литарски Skyactiv-D турбодизел кој испорачува 150 коњски сили при 4500 вртежи во минута и моќни 380 Nm вртежен момент од 1800 до 2600 вртежи во минута. Перформансите не се за потценување – 100 километри на час пристигаат за 10.2 секунди (9.4 кај верзијата со мануелен менувач) а максималната брзина е 194 километри на час (197 со мануелен менувач). Потрошувачката во град според официјалните бројки е 6.4 литри на 100 километри (6.0 со мануелен менувач), но ние измеривме околу 8.5 литри. Моторот импресионира со тивкото и рафинирано работење – вибрациите се незабележителни а звукот притаен и дискретен.
Останува само уште да го донесеме конечниот заклучок – новата Mazda CX-5 е примамлив урбан SUV со спортски карактер, привлечен дизајн и многу, многу нова технологија. Ќе им се допадне како на фамилијарните луѓе, така и на оние со авантуристички дух кои сакаат да го напуштат асфалтот и да уживаат во природата. Новиот дизајнерски јазик на Mazda е полн погодок, а автомобилот ги привлекува и задржува погледите на случајните минувачи. Сосема е јасно зошто Mazda го зголеми производството на CX-5 на 240.000 автомобили годишнo – едноставно, имаат вистински хит во своите раце.
- 2.2 литарски турбо-дизелски агрегат, 4 цилиндри
- Моќност: 150 коњски сили / 4500 вртежи во минута
- Вртежен момент: 380 Nm / 1800 вртежи во минута
- Максимална брзина: 194 км/час
- Забрзување 0-100: 10.2 секунди
- Должина: 4555 mm
- Ширина: 1840 mm
- Висина: 1710 mm
- Меѓуоскино растојание: 2700 mm
- Багажен простор: 503 литри (1620 со спуштени задни седишта)
- Потрошувачка: 6.4 (официјална, градска), 8.5 (измерена, градска)
- Цена на тестираниот модел: Mazda CX-5 2.2 Skyactiv-D Revolution 4×4 – 32.480 Евра
Фотографија: Дејан Маликовски
