Land Rover го прикажа новиот обновен Discovery кој ќе биде јавно претставен на автомобилскиот саем во Франкфурт.
Разликите се дискретни и не се лесни за распознавање, но Land Rover ги редизајнирал предниот браник, решетката и предните светла кои сега се изработени со LED технологија. Додаден е и нов избор од алуминиумски фелни, додека ознаката Land Rover на поклопецот од моторот е заменета со ознака Discovery во стилот на моделите од Range Rover гамата.
Освежениот Land Rover Discovery ќе го погонува истиот 3.0-литарски V6 агрегат со 256 кс при 4,000 вртежи и 600 Nm вртежен момент при 2,000 вртежи во минута. Сепак, агрегатот е направен да биде попријателски настроен кон животната средина, така што емисијата на издувни гасови е намалена на 213 грама на километар, додека просечната потрошувачка на гориво е подобрена на 8 литри на 100 километри.
Погонската единица е усогласена со осум-степена автоматска ZF трансмисија и му овозможува на 2,570 килограми тешкиот теренец да забрза од 0-100 км/ч за 8.8 секунди пред да ја достигне максималната брзина од 180 км/ч.
Автомобилот е опремен со неколку нови системи за подобрување на безбедноста како приказ на мртва точка, предупредување за судир, детекција за сообраќај и камери за наназад, како и предупредување за возило што се приближува. Ќе биде понуден и Meridian Surround аудио систем со 17 звучници, со комбинирана максимална моќност од 825 вати.
