Според најновиот извештај на институтот Bruegel од Брисел, регулативите на ЕУ кои бараат батериските ќелии за електричните возила да бидат произведени во Европа може да ги зголемат трошоците за производство на типично електрично возило за околу 2100 евра.
Авторите предупредуваат дека стратегијата за заштита на домашната автомобилска индустрија од кинеската конкуренција ги штити етаблираните производители, но сметката на крајот ја плаќаат купувачите и даночните обврзници.
Пресметката се заснова на проценката дека обврската за користење на батериски ќелии со потекло од ЕУ ја зголемува нивната цена од 50 евра на 85 евра по киловат-час. За просечно електрично возило со батериски пакет од 60 kWh, оваа разлика од 35 евра по kWh создава дополнителен трошок од околу 2100 евра по возило.
Овие услови за потекло на компонентите се дел од предлог-законот за индустриско забрзување што Европската комисија го предложи уште во март 2026 година. За еден автомобил да се квалификува за државни субвенции, јавни набавки или даночни олеснувања за службени возила, ќе треба да се склопува во ЕУ и најмалку 70% од неговите компоненти (без батеријата) да бидат од европско потекло, додека батеријата ќе мора да содржи барем три главни компоненти произведени во унијата.
Економистите на Bruegel истакнуваат дека ова дополнително оптоварување најсилно ќе ги погоди автомобилите од поевтините сегменти, каде купувачите се најчувствителни на цените. Дополнително, тие посочуваат дека заштитните царини што ЕУ ги воведе против кинеските електрични возила не ги опфаќаат плагин хибридите, што доведе до значителен скок на увозот на хибриди од Кина во Европа.
Извештајот на Bruegel заклучува дека иако заштитните мерки можат да и купат време на европската авто-индустрија да се прилагоди, тие не можат да бидат замена за вистинска конкурентност базирана врз иновации, пониски трошоци за енергија, подобрување на мрежата за полнење и ефикасно рециклирање на батериите.
