Новото возило го добива своето име од познатиот шпионски авион Lockheed SR-71 Blackbird.
За разлика од трендот на турбополначи и хибридни погони, Blackbird се гордее со 6.2-литарски атмосферски V8. Истиот е развиен во соработка со Ilmor Engineering и ќе испорачува околу 850 коњски сили. Целата моќност се пренесува исклучиво на задните тркала преку старошколски шестстепен рачен менувач.
Благодарение на монокок шасијата и карбонските панели, автомобилот нема да ја надмине тежината од 1360кг. Забрзувањето до 100 км/час ќе трае околу 2.5 секунди додека максималната брзина изнесува 354 км/час.
Дизајнот на Blackbird комбинира елегантни облини и агресивни рабови, вклучувајќи отвор за воздух на покривот, странични отвори и огромен заден дифузер.
На задната страна се наоѓаат четири издувни цевки во форма на дијамант, над кои се наоѓаат активните аеродинамични крила кои се активираат при брзина од 114 km/h под агол од 71 степен.
Внатрешноста на автомобилот е целосно посветена на аналогниот систем на управување и воопшто нема екрани во кабината. Дополнително, кабината содржи физички копчиња, ротирачки селектор за режими на возење, четири држачи за чаши и копче за стартување поставено на плафонот.
Производството на постоечкиот модел Venom F5 ќе заврши во 2028 година, па Blackbird се очекува да пристигне во 2029 година. Hennessey планира да произведе само 71 примерок, од кои секој (во САД) ќе чини 2.5 милиони долари.
