Пред 20 години Veyron редефинираше што всушност значи хиперавтомобил. Денес, со F.K.P. Hommage, Bugatti оддава почит и на брилијантниот ум позади Veyron, и на автомобилот кој стана бенчмарк со кој се споредуваат сите други.
Кажете му „Добредојде“ на FKP Hommage (да ги избегнеме точките) – подвижен омаж на оригиналниот Veyron и визионерот позади него, Prof. Dr. Ferdinand Karl Piëch. FKP Hommage е изграден врз W16 шасијата на Bugatti и го добива моќниот квад-турбо мотор од Chiron Super Sport (автомобилот кој прв надмина 300 милји на час, одноно 480 километри на час) – а тоа значи 1600 коњски сили и 1600 Nm вртежен момент.
Каросеријата е инспирирана од Veyron, но истовремено е целосно редизајнирана за да изгледа како… Veyron кој би бил лансиран на пазарот во 2026. Веднаш се забележува поагресивниот преден дел, со потенки и пошироки светла, и предната маска која е повнимателно интегрирана во предницата. Надворешноста е во црвена боја, додека црниот дел е всушност видлив карбон – сето тоа во чест на двобојната комбинација на Veyron.
Кабината е темелно базирана на Chrion, но со внимателно-дизајнирани детали. Управувачот е кружен, како во Veyron, а уникатната централна конзола е изработена од единствено парче алуминиум и има Audemars Piguet Royal Oak Tourbillon вграден во арматурната табла.
Инаку, FKP Hommage е вториот автомобил на Solitaire програмата на Bugatti (првиот беше Brouillard) и директно покажува колку темелно и колку екстензивно може да се работи на вашиот личен Bugatti автомобил. Сè додека сте подготвени да го платите тоа, секако.
