Lexus го претстави Sport Concept – спектакуларен концепт за (најверојатно) електричен или електрифициран автомобил кој ќе ја предводи иднината на јапонскиот луксузен бренд.
Концептот на Lexus изгледа едноставно спектакуларно – долг, низок и широк, Sport Concept дефинитивно се навраќа на пропорциите на LFA и LC и сега за сега не се знае дали серискиот модел кој ќе произлезе ќе носи ново име или ќе биде наследник на еден од легендарните модели на јапонскиот бренд.
Пропорциите се хиперболизирани, но тоа и не е неочекувано за Lexus – и LFA и LC беа класични купеа со хипер-модерни детали. Големите тркала и издолжениот преден поклопец сугеририраат дека можеби ќе добиеме и некаков мотор со внатрешно согорување, додека на предниот дел особено ни се интересни предните светла кои се интегрирани во предните отвори за воздух.
Профилот навистина наликува на LFA; додека на задниот дел доминираат широкиот светлосен потпис, големата, осветлена Lexus значка и огромниот заден дифузер со интегрирано трето стоп-светло.
Сега за сега, Lexus не објавува што го придвижува концептот, но веќе започнуваат да се „шират муабети“ дека е целосно-електричен – Lexus веќе најави неколку целосно-електрични модели, а и фактот дека концептот нема никакви завршетоци на издувен систем некако го сугерираат тоа. Ќе видиме.
