Откако од темел ги смени дизајнерскиот јазик и пристап на Renault, Gilles Vidal се враќа во Stellantis да биде одговорен за дизајн на европските брендови на групацијата.
„Длабокото разбирање на Vidal на европската автомобилска култура и неговата дизајнерска филозофија со поглед кон иднината ќе бидат исклучително важни како што продолжуваме да ја редефинираме мобилноста и да го зацврстуваме идентитетот на нашите европски брендови“ – изјави Jean-Philippe Imparato, кој е на чело на европските брендови во Stellantis.
Секако, Vidal веќе има огромно искуство со брендови на Stellantis, односно PSA. Тој помина 25 години во Citroen и Peugeot, а во 2020 си замина од Peugeot за да го преземе дизајнерското водство во Renault. Сега, неколку години подоцна (и со многу дополнително искуство) се враќа во Stellantis. Интересно, Vidal си заминува од Renault само неколку месеци по Luca de Meo, кој го напушти франуцскиот бренд за да застане на чело на луксузната групација Kering.
Gilles Vidal ќе стартува на новата позиција во Октомври, а под неговото будно око ќе бидат Peugeot, Citroen, Opel, Fiat, Alfa Romeo, Maserati, Lancia, DS и Abarth.
