Синиот овал веќе со години ја крати својата понуда во Европа, но сега главниот извршен директор бутка кон повторно стартување на развојот на нови модели.
Веќе неколку години Ford е во фаза на трансформација, а директен резултат на тоа е „пензионирањето“ на имиња кои навистина значат многу за брендот. Ford веќе ги пензионираше Mondeo и безвременската Fiesta, а за Ноември годинава е најавен крајот на производството на Focus. Ваквите чекори на Ford не само што ги разочараа долгогодишните фанови на овие модели, туку и оставија прилично голема празнина кај дилерите на брендот, кои веќе некое време инсистираат да добијат наследници на овие супер-популарни модели.
Според некои гласини, главниот извршен директор на Ford – Jim Farley – сака да го рестартира развојот на патнички возила, специфично наменети за европскиот пазар. Според германскиот Automobilwoche, оваа насока веќе била објавена за време на видео-повик со различни дилери на Ford од Европа, а на повикот биле присутни и директорите на Ford во Германија, Австрија и Швајцарија.
Океј, но што точно значи ова? Па сега за сега не знаеме ништо – но според еден од присутните дилери, овие вести се „големо олеснување“. Истиот дилер напоменал дека на Ford му требаат и други нови модели, а не само електрични возила. Ова е интересно стратешко поместување, со оглед на тоа дека Ford веќе неколку години интензивно работи на развој на нови електрични модели, делумно во соработка со Volkswagen. Дали оваа соработка ќе продолжи и дали и новите модели на Ford ќе бидат изградени врз платформа на Volkswagen, останува да видиме – но навистина се надеваме дека ќе добиеме нови Fiesta, Focus и Mondeo.
Истовремено, комерцијалната дивизија на Ford работи одлично. Комерцијалните возила на Ford се продаваат одлично во Европа и во моментов имаат учество од дури 20%. Покрај огромниот Ranger и легендарниот Transit, Ford нуди уште неколку комерцијални возила во различни големини, а нуди и практични „цивилни“ верзии кои се навистина популарни кај купувачите.
