Наречете го Shooting Brake, наречете го караван со три врати, наречете го како сакате. Ние ќе го наречеме Спектакуларен.
Под кожата на овој прекрасен автомобил се кријат гените од BMW M8. Добро де, тоа не е толку директно кажано, но од BMW кажуваат дека Speedtop ќе биде придвижуван од „најмоќниот V8 кој BMW го нуди“, а тоа пак нè тера да размислуваме во насока на M8 Competition и неговиот 4.4-литарски V8 кој испорачува 625 коњски сили и 750 Nm вртежен момент.
Но во суштина, сето тоа е апсолутно неважно. Зошто? Па едноставно… Погледнете го. Сега за сега, BMW го нарекува ова ремек-дело Concept Speedtop, но тоа Concept можете слободно да го исфрлите од употреба. BMW веќе потврди дека Speedtop ќе оди во сериско производство и дека ќе бидат произведени само 70 примероци. Скоро со сигурност можеме да претпоставиме дека сите 70 примероци се или веќе резервирани, или веќе продадени. Сигурни сме и дека за жал многу од нив нема никогаш да видат вистински асфалт и дека најверојатно само ќе „дремат“ по приватни колекции – но среќни сме дека постојат.
Кабината е помалку или повеќе директно преземена од Серијата 8 на BMW, но целата е преработена и обвиена во луксузни материјали за да одговара на еден ваков супер-ексклузивен автомобил. Од BMW кажуваат дека Speedtop е дизајниран за „викенд бегање за двајца“, па затоа нема задни седишта. Нема ни некој особено голем багажник, но ќе го простиме тоа.
И на крај, не можеме нешто многу повеќе да кажеме. Освен дека им завидуваме на тие среќни (и многу, многу богати) 70 купувачи на Speedtop.
