Помоќен, поефикасен и технолошки понапреден – Peugeot го претстави освежениот 208! – CARclub.mk | #1 за Автомобилите full screen background image
Search

Помоќен, поефикасен и технолошки понапреден – Peugeot го претстави освежениот 208!

Верувале или не, тековниот 208 дебитираше во 2019 – па Peugeot одлучи дека е време темелно да го освежи својот бестселер!

Ајде прво да зборуваме за дизајнот. Освежувањето започнува со редизајнираниот преден дел кој го добива истиот светлосен потпис како и 9X8 Hypercar (да, оној од Le Mans) кој веќе го видовме во одредена форма кај освежениот 2008. Овој светлосен потпис всушност го заменува едното дневно светло со три вертикални – кои пак дополнително го истакнуваат мотивот на лавја канџа кој е препознатлив за Peugeot.

Профилот е неизменет, но достапни се нови дизајни за 16 и 17-инчните алуминиумски тркала. Изменет е задниот дел кој добива нова LED линија и три црвени светлосни елементи кои повторно се тука да го потенцираат ефектот на лавја канџа. Сите верзии ќе доаѓаат со црни странични ретровизори, но 208 GT добива црни декоративни елементи околу крилата како и црн кров.

Новиот 208 ќе биде достапен во седум бои – Agueda Yellow, Selenium Grey, Artense Grey, Perla Black, Banquise White, Elixir Red и Vertigo Blue. Секако, освежениот 208 го добива и новото лого на Peugeot.

Уште потемелно е освежувањето во кабината, кое започнува со нови материјали за површините во ентериерот а продолжува со нов 10-инчен дигиталане панел со инструменти кој ќе биде стандарден на Allure и GT моделите.

Сите верзии добиваат нов 10-инчен централен мултимедијален уред со i-Connect, но дополнително ќе биде достапен и i-Connect Advanced. Без разлика кој систем ќе го одберете ќе добиете безжично Apple CarPlay и Android Auto поврзување, а Allure и GT моделите добиваат и три USB-C приклучоци, побрз безжичен полнач и нови паркинг камери со значително повисока резолуција.

Во однос на погонските опции, францускиот хечбек и понатаму е еден од најфлексибилните во сегментот. Понудата започнува со конвенционалните 1.2-литарски бензинци – едниот атмосферски со 75 коњски сили и 5-степен мануелен менувач, другиот со турбополнач, 100 коњски сили и 6-степен мануелен менувач.

Поврзано:   Peugeot Sport доби специјално еко-признание од FIA

Скалило погоре се новите хибридни погони кои го комибинираат 1.2-литарскиот PureTech турбо-бензинец со 100 или 136 коњски сили со 48-волтен систем. Овој погон се комбинира со e-DSC6 електрифициран автоматски менувач со двојна спојка во која е вграден електромотор. Според Peugeot, овој погон нуди намалена потрошувачка до 15%, но и овозможува повеќе од 50% од возењето во градски услови да биде на струја, односно без никаква емисија на штетни гасови.

Конечно, тука е и надградениот електричен погон на E-208. Овој погон добива батерија со капацитет од 51 kWh како и нов електромотор со моќност од 156 коњски сили. Според WLTP мерењата овој погон овозможува автономија од 400 километри Како и можност за брзо полнење од 20% до 80% за помалку од 25 минути – со доволно брз полнач, секако. Инаку, за полнење во домашни услови достапни се два вградени полначи – монофазен со моќност од 7.4 kW, како и трофазен со моќност од 11 kW.

И на самиот крај, за да потенцираме колку е всушност важен 208 за Peugeot ќе повториме дека за мало повеќе од 3 години продадени се повеќе од еден милион примероци од францускиот хечбек, а во 2021 и 2022 Peugeot 208 беше најпродаван во Европа во сите сегменти. Секако, огромен удел тука има и електричнито Е-208 кој минатата година беше најпродавано електрично возило во Б-сегментот во Европа, а во Франција беше најпродаван нов автомобил.

Продажбата на освежениот 208 ќе започне во Ноември.

 



Алфа и Омега на CARclub. Играчките остануваат, само стануваат поскапи.