Покрај со целосно-електричен погон, новата Opel Mokka ќе може да се добие и со модерни и чисти турбо-бензински и турбодизел мотори.
Сепак, ајде прво за Mokka GS Line – поспортската изведба на Mokka добива црн Vizor, црвени детали, двобојна комбинација, како и поагресивни браници и поголеми, спортски тркала. Кабината добива уникатни материјали за седиштата, црн тапацир на кровот и црвен панел со инструменти. Сето ова ја прави Mokka да изгледа некако ретро-футуристичко и спортски – и навистина, многу добро!
Во однос на моторите, новата Opel Mokka ќе може да се добие со еден од два бензински мотори, или еден турбодизел. Основниот е 1.2-литарски турбо-бензинец со три цилиндри кој испорачува 100 коњски сили и 205 Nm вртежен момент, и може да се добие само со мануелен менувач со шест брзини. Помоќната варијанта на истиот мотор испорачува 130 коњски сили и 230 Nm вртежен момент, и може да се комбинира со шест-степен мануелен или осум-брзински автоматски менувач.
Доколку сакате турбодизел, ќе можете да ја нарачате Mokka со 1.5-литарски четири-цилиндерски „дизелаш“ кој испорачува 110 коњски сили и 250 Nm вртежен момент. Овој мотор може да се комбинира само со шест-степен мануелен менувач.
