full screen background image
Search

ПАНОРАМА: Новиот Mercedes-Benz S63 AMG со 585 коњски сили!

Автомобилот наменет за вистинските плутократи, за оние кои сакаат безкомпромисни перформанси и врвен луксуз е тука – Дами и Господа, новиот Mercedes-Benz S63 AMG!

Секогаш кога пишувам за Mercedes-Benz имам чувство дека сум недоволно подготвен. Дека би требало да носам скап костум и уште поскап часовник. Едноставно, Германскиот бренд тоа го бара од мене. Но кога пишувам за AMG верзиите на Mercedes-Benz имам чувство дека на тој костум и часовник одлично би им прилегале и професионални чевли за возење.

Mercedes-Benz S 63 AMG (W222) 2013

Пред нас е новиот S63 AMG. Тој може да се пофали со голем огромен 5.5-литарски бензински мотор кој интимно соработува со не еден, туку два турбо полначи. Резултатот на таа блиска соработка се 585 коњски сили и 900 Nm вртежен момент. Единствената цел на овој мотор, според челниците на Mercedes-Benz (и лудите професори на AMG) е да ги „надмине перформансите на сите споредливи мотори“. Воопшто не се сомневаме во можностите на овој мотор. Благодарение на сета таа моќ и вртежен момент, како и намалената тежина од 41 килограм во споредба со претходникот, S63 AMG забрзува до 100 километри на час за само 4 секунди (или 4.4 ако го нарачате со 4Matic системот за погон на сите четири тркала).

Mercedes-Benz S 63 AMG (W222) 2013

Секако, покрај масивниот мотор, купувачите на S63 AMG ќе уживаат во спортската суспензија, поголемите кочници, специјалниот бодикит и уникатните тркала од лесна легура. Во внатрешноста ќе ги пречекаат прекрасните AMG спортски седишта, многуте AMG логоа и детали кои го издвојуваат S63 AMG од „обичната“ S-Class. Дополнително, купувачите со подлабоки џебови ќе можат да нарачаат многу дополнителна опрема и специјални додатоци, како што е поклопец на моторот изработен од јаглеродни влакна, карбон пакет за екстериерот и уште многу други ситници.

Поврзано:   Новата C-Class на Mercedes-Benz пристигна во Македонија!

Mercedes-Benz S 63 AMG (W222) 2013

Она што ние можеме да го забележиме е дека новиот S63 AMG изгледа многу подискретно од својот претходник, но тоа не е лоша работа – сепак се работи за луксузна лимузина со монструозен мотор која на својот возач треба да му обезбеди перформанси кои не се од овој свет, а истовремено да му понуди максимална дискреција. Полн погодок!



Алфа и Омега на CARclub. Играчките остануваат, само стануваат поскапи.