Дизајнерската куќа Bertone го објави концептот Aston Martin Rapide Shooting Brake, кој ќе дебитира наредната недела во Женева.
Концептот е наречен Jet 2+2 и е направен да ја прослави шеесет годишната соработка помеѓу двете компании. Тој е наследник на Jet 2 концептот од 2004-та, кој претставуваше Shooting Brake верзија на Vanquish. Покрај промената на стилот на каросеријата, концептот има исти димензии и механика како стандардниот Rapide.
Што се однесува до дизајнот, Ц-столбовите се благо навалени нанапред за да се добие чувство на движење дури и кога автомобилот стои во место. На задниот дел се забележуваат остро закосена задна врата и нова светлосна група која наликува како да е преземена од суперавтомобилот One-77.
Кабината има распоред на седење 2+2 со посебни седишта, а благодарение на новиот стил на каросеријата на задната клупа можат да се сместат и повисоки патници. Задните седишта можат да се преклопат за да се зголеми товарниот простор, а елементите од алуминиум, дрво и двобојна кожа го прават попривлечен од стандардната верзија.
