Mercedes-Benz одлучи да оддаде почит на наследството на незаменливата G-Class со специјалната изведба која има супер-комплицирано име – Mercedes-Benz G-Class Edition Stronger Than The 1980s.
Името (кое, нормално, го пишуваме со копи-пејст, а не рачно) на специјалната серија оддава што всушност сака да постигне Mercedes-Benz – а тоа е да понуди ретро изведба на новиот G-Class. Всушност, оддава почит на 280GE од 80-тите години.
И деталите се фантастични – веднаш ја забележуваме онаа препознатливата зелена боја, а достапна е и Colorago Beige, но во нашите очи зелената боја е подобра.
Дополнително, Mercedes-Benz G-Class Edition Stronger Than The 1980s (да, копи-пејст пак) добива и црн преден дел, црни крила и црни браници како верзијата од 80-тите години, а добива и портокалови трепкачи, тркала со пет краци, ретро значка на поклопецот на моторот и стара значка на задниот дел.
Кабината исто така добива ретро-инспириран третман. Седиштата се делумно обвиени во кожа а делумно во кариран материјал. Секако, тука се и модерните технологии кои го прават G-Class да биде незапирлив.
Ќе бидат произведени само 460 примероци од Mercedes-Benz G-Class Edition Stronger Than The 1980s (погодувате, пак копи-пејст) и ќе бидат базирани на G450d со дизел мотор, или пак G500 со бензински мотор. Нарачките се веќе започнати и Mercedes-Benz G-Class Edition Stronger Than The 1980s (копи-пејст) чини од околу 160.000 Евра (во Германија).
