Електричниот Renault 5 E-Tech и неговиот пандан од Alpine се прогласени за Европски Автомобил на Годината за 2025.
Од Renault гордо кажуваат дека оваа награда ја истакнува значајноста на стратегијата за електрификација на Renault и Alpine. Овие автомобили се поставени на AmpR Small платформата за мали електрични возила која им овозможува да испорачаат исклучителна вредност кон купувачите, а притоа да бидат слободни самостојно да се позиционираат во однос на дизајнот, развојот, технологиите и корисничкото искуство.
Renault 5 E-Tech заедно со Alpine A290 беа меѓу финалистите кои беа објавени минатата година. Конкуренцијата годинава беше навистина моќна – меѓу финалистите беа и Alfa Romeo Junior, Citroen Citroën ë-C3 и C3, Cupra Terramar, Dacia Duster, Hyundai Inster и KIA EV3. Победникот го избраа 60 автомобилски новинари од 23 различни земји, а Renault веќе ја има освоено титулата со Renault 16 во 1966, Renault 9 во 1982, Clio во 1991, Scenic во 1997, Megane во 2003, повторно Clio во 2006 и Scenic E-Tech во 2024. Да, ова е втора последователна победа за Renault.
