На само неколку дена пред официјалната премиера во Женева протекоа првите официјални фотографии од новиот голем седан на Peugeot!
Фотографиите кои се појавија на Интернет го откриваат новиот, модерен и затегнат дизајн на знаменосецот на Peugeot. Познавачите на брендот ќе забележат детали кои влечат инспирација и од постарите модели на Peugeot – конкретно, 405 и 406, но во модерна, динамична интерпретација.
На предниот дел се истакнуваат широките светла и скоро-вертикалните дневни светла во форма на „заби“, страничните линии се чисти и луксузни, а задниот дел е ретро-модерен. Севкупно, дизајнот е привлечен и повторно јасно се наметнуваат премиум-аспирациите на францускиот бренд.
Но ако екстериерот е модерен, тогаш кабината е нешто посебно – Peugeot 508 ќе ја добие најновата интерпретација на i-Cockpit кабината каде доминираат високата технологија, многу внимание посветено на деталите и секако – малиот управувач кој стана карактеристичен за Peugeot.
Сега за сега не се потврдени никакви детали околу технологиите и моторите кои ќе се вградуваат во новиот 508 – за тоа ќе треба да „се стрпиме“ до официјалната премиера – но веќе се шпекулира дека покрај очекуваните турбо-бензински и турбодизел мотори во гамата ќе се најде и хибриден модел кој би требало да нуди околу 300 коњски сили!